Border News Agency
အိန္ဒိယ၊ ဧပြီ ၁၇။
အိန္ဒိယနိုင်ငံ၊ မီဇိုရမ်ပြည်နယ်၊ အိုင်ဇောမြို့မှာ ကျပ်သိန်း ၁၄,၀၀၀ ကျော်တန်ဖိုးရှိ မူးယစ်ဆေးတွေနဲ့မြန်မာနိုင်ငံသားအပါအဝင် ၄ ဦး ဖမ်းဆီးရမိခဲ့တယ်လို့ မီဇိုရမ်ရဲတပ်ဖွဲ့က ဧပြီလ ၁၆ ရက်၊မနေ့ကထုတ်ပြန်ပါတယ်။
အဲဒီမူးယစ်ဆေးဝါး တိုက်ဖျက်ရေးအဖွဲ့တွေဟာ ဧပြီလ ၁၆ ရက်၊မနေ့က ဝင်ရောက်စီးနင်းခဲ့ရာမှာ ကာလတန်ဖိုး ကျပ်သိန်း ၁၄,၀၀၀ ကျော် (အိန္ဒိယရူပီး ၄ ဒသမ ၉ ကုဋေခန့်) တန်ဖိုးရှိတဲ့ စိတ်ကြွဆေးပြားတွေဖမ်းဆီးရမိခဲ့တာလို့ဆိုပါတယ်။
အဲဒီ အာသံရိုင်ဖယ်တပ်နဲ့ အိုင်ဇောရဲတပ်ဖွဲ့တို့ ပူးပေါင်းကာ မြို့တွင်းက နေရာနှစ်ခုမှာ ဝင်ရှာခဲ့တာဖြစ်ပြီး ဒါဟာ နယ်စပ်ကနေ မှောင်ခိုဝင်လာတဲ့ မူးယစ်ဆေးဝါးတွေဖြစ်တယ်လို့ ဆိုပါတယ်။
အဲဒီအဖမ်းခံရသူတွေထဲမှာ ချင်းပြည်နယ်ဘက်ကနေ လာတဲ့ မြန်မာနိုင်ငံသား ၂ ဦးနဲ့ အိုင်ဇောဒေသခံ ၂ ဦး ပါဝင်နေတာပါ။
သူတို့ဟာ နယ်စပ်ဖြတ်ကျော် မူးယစ်ဆေးဝါး သယ်ယူဖြန့်ဖြူးတဲ့ ကွန်ရက်တခုမှာ ပါဝင်ပတ်သက်နေတယ်လို့ ရဲတပ်ဖွဲ့က သံသယရှိနေပါတယ်။
အဲဒီဖမ်းမိထားတဲ့ မြန်မာနိုင်ငံသားတွေနဲ့ ဒေသခံတွေကို အိုင်ဇောနယ်မြေရဲစခန်းမှာ ထိန်းသိမ်းထားပြီး မူးယစ်ဆေးဝါးဥပဒေ (NDPS Act)နဲ့ အမှုဖွင့် အရေးယူထားပါတယ်။
သူတို့နဲ့ ဆက်စပ်နေတဲ့ အခြားသူတွေကိုလည်း ဆက်လက်စုံစမ်းနေတယ်လို့ ဆိုပါတယ်။
မီဇိုရမ်ပြည်နယ်အတွင်းမှာ အခုနောက်ပိုင်း မြန်မာနိုင်ငံသားတွေ ပါဝင်ပတ်သက်နေတဲ့ မူးယစ်ဆေးဝါး ဖမ်းဆီးရမိမှုတွေ ခပ်စိပ်စိပ် ဖြစ်လာနေတာကြောင့် လုံခြုံရေးတပ်ဖွဲ့တွေက နယ်စပ်ဝင်ပေါက်တွေမှာ အရင်ကထက် ပိုပြီး စောင့်ကြည့်စစ်ဆေးနေတယ်လို့သိရပါတယ်။
