Border News Agency
ဘင်္ဂလားဒေ့ရှ်၊ဧပြီ ၁၇။
ဘင်္ဂလားဒေ့ရှ်နိုင်ငံ၊ တက်ကနာ့ဖ်မြို့နယ်ထဲမှာ ရေတပ်ကမူးယစ်ဆေးဝါး ရှာဖွေမှုနှစ်ခု လုပ်ခဲ့ရာမှာ စိတ်ကြွဆေးပြား ၇၂,၀၀၀ ကျော်၊မြန်မာကျပ်ငွေ ၁၁,၀၀၀ နဲ့အတူ လူ ၂ ဦးကို ဖမ်းမိခဲ့ပါတယ်။
အဲဒီ တက်ကနာ့ဖ်မြို့နယ်ထဲမှာ ဧပြီလ ၁၆ ရက်၊မနက် ၃ နာရီအချိန်က ဆာဘရန်းယူနီယံထဲက အိမ်တလုံးကို ဝင်ရှာခဲ့တယ်လို့ ဘင်္ဂလားဒေ့ရှ်ရေတပ်ကထုတ်ပြန်ပါတယ်။
အဲဒီမှာ မြေကြီးထဲ မြှုပ်ဝှက်ထားတဲ့ စိတ်ကြွဆေးပြား ၄၂,၀၀၀ ကို တွေ့ခဲ့သလို မူးယစ်ဆေးနဲ့ ပတ်သက်သူ ၂ ဦးကိုလည်း ဖမ်းနိုင်ခဲ့တယ်လို့ဆိုပါတယ်။
အဲဒီအပြင် ယူနီယံထဲက ရှာပိုရီကျွန်းအနီး ဆိုက်ထားတဲ့ သစ်သားစက်လှေတစီးရဲ့ လျှို့ဝှက်အခန်းတွေထဲမှာ ဝှက်ထားတဲ့ စိတ်ကြွဆေးပြား ၃၀,၀၀၀ နဲ့ မြန်မာငွေတွေကို ထပ်ပြီး သိမ်းဆည်းရမိခဲ့တယ်လို့ဆိုပါတယ်။
အဲဒီ ဖမ်းမိထားတဲ့သူတွေနဲ့ မူးယစ်ဆေးဝါးတွေကို တက်ကနာ့ဖ်နယ်မြေရဲစခန်းဆီ လွှဲပေးလိုက်ပြီဖြစ်လို့ လိုအပ်တဲ့ စစ်ဆေးမှုတွေ ဆက်လုပ်နေတယ်လို့ ဆိုပါတယ်။
ဘင်္ဂလားဒေ့ရှ်ရေတပ်ကတော့ နယ်စပ်နဲ့ ကမ်းရိုးတန်းတလျှောက် မူးယစ်ဆေးဝါး မှောင်ခိုကူးတာတွေကို ကာကွယ်ဖို့အတွက် အခုလိုပဲ ပုံမှန်ကင်းလှည့်စစ်ဆေးတာတွေ ဆက်လုပ်သွားမယ်လို့ ဆိုပါတယ်။
