Border News Agency
ပဲခူး၊ မေ ၃။
ပဲခူးတိုင်း၊ လယ်ဒိုမြို့နယ်အတွင်းက အာဏာသိမ်းစစ်တပ်ရဲ့ဂိတ်စခန်းတခုကို ကရင်အမျိုးသားလွတ်မြောက်ရေးတပ်မတော် (KNLA) က ဝင်ရောက်တိုက်ခိုက်ခဲ့ရာမှာ အရာရှိ ၂ ဦးအပါအဝင် ၅ ဦး သေဆုံးသွားတယ်လို့ ကရင်အမျိုးသားအစည်းအရုံးမှ မေလ ၃ ရက်၊ဒီနေ့ထုတ်ပြန်ပါတယ်။
အဲဒီပိန်းဇလုပ်နဲ့ သူဌေးကုန်းအကြားက မီးရထားလမ်းတံတားမှာ တပ်စွဲထားတဲ့ စခန်းကို မေလ ၂ ရက်၊ ညပိုင်းက KNLA တပ်ရင်း ၉ ရဲ့ အထူးတပ်ဖွဲ့ဝင်တွေက ရှောင်တခင် ဝင်ရောက်စီးနင်းခဲ့တာ ဖြစ်ပါတယ်။
အဲဒီတိုက်ပွဲအတွင်း အာဏာသိမ်းစစ်တပ်ရဲ့ စခန်းတဲ ၃ လုံးကို မီးရှို့ဖျက်ဆီးနိုင်ခဲ့သလို သေနတ် ၅ လက်နဲ့ ခဲယမ်းတချို့ကိုလည်း KNLA ဘက်က သိမ်းဆည်းရမိခဲ့ပါတယ်။
KNLA တပ်ဖွဲ့ဝင်တွေဘက်ကတော့ အထိအခိုက်မရှိဘဲ အောင်မြင်စွာ ပြန်လည်ဆုတ်ခွာနိုင်ခဲ့ပြီး ဒါဟာ စစ်မှန်တဲ့ ဖက်ဒရယ်ဒီမိုကရေစီပြည်ထောင်စု ပေါ်ပေါက်ရေးအတွက် စစ်ရေးအရ တွန်းလှန်နေတာလို့ ဆိုပါတယ်။
KNU အနေနဲ့ အာဏာသိမ်းစစ်တပ်ကို နိုင်ငံရေးရော စစ်ရေးအရပါ အစဉ်တစိုက် တော်လှန်နေသလို ပြည်သူလူထု လိုလားတဲ့ ပန်းတိုင်ရောက်အောင် ဆက်လက်ကြိုးပမ်းသွားမယ်လို့လည်းဆိုပါတယ်။
