Border News Agency
ပဲခူး၊ မေ ၆။
ပြည်သူ့ကာကွယ်ရေးတပ်မတော် (PDF) ဖွဲ့စည်းတည်ထောင်တဲ့ ၅နှစ်ပြည့် အထိမ်းအမှတ်အဖြစ် ပဲခူးတိုင်းအတွင်းရှိ PDF တပ်ရင်းတွေမှာ အခမ်းအနား ၆ရပ်နဲ့ မေလ ၅ ရက်နေ့ ကပြုလုပ်ခဲ့ပါတယ်။
အဲဒီအခမ်းအနားကို တောင်ပိုင်းတိုင်းစစ်ဒေသ၊အမှတ် ၂ စစ်ဒေသခွဲ ပဲခူးတိုင်းစစ်ဒေသရှိ တပ်ရင်းတွေက စုပေါင်းပြုလုပ်ခဲ့တာဖြစ်ပြီး ပြည်သူ့ကာကွယ်ရေးတပ်မတော်အလံ လွှင့်တင် အလေးပြုခြင်းနဲ့သစ္စာအဓိဋ္ဌာန် ၄ ချက် ရွတ်ဆိုတာတွေပြုလုပ်ခဲ့ကြပါတယ်။
ဒါ့အပြင် ခေတ်အဆက်ဆက် ဖက်ဒရယ်ဒီမိုကရေစီ အရေးတော်ပုံအတွင်း ကျဆုံးခဲ့တဲ့ ရဲဘော်တွေကို အလေးပြုခဲ့ကြသလို၊ ကာကွယ်ရေးဝန်ကြီးဌာနက ပေးပို့တဲ့ ၅ နှစ်ပြည့် သဝဏ်လွှာကိုလည်း ဖတ်ကြားခဲ့ကြပါတယ်။
အဲဒီအခမ်းအနားရဲ့အစီအစဉ်တစ်ခုအနေနဲ့ တော်လှန်ရေးအပေါ် သစ္စာစောင့်သိဖို့အတွက် ကတိသစ္စာပြုခြင်းနဲ့ သစ္စာရေသောက်တာကိုလည်းစနစ်တကျ ထည့်သွင်းပြုလုပ်ခဲ့ကြတယ်လို့ဆိုပါတယ်။
ပဲခူးတိုင်းအတွင်းက PDF တပ်ရင်းတွေဟာ ပြီးခဲ့တဲ့ ၅ နှစ်တာအတွင်း စစ်ရေးလှုပ်ရှားမှုတွေ အားကောင်းခဲ့သလိုအခုလို ၅ နှစ်ပြည့် အခမ်းအနားကို စစ်ရေးပြဟန်နဲ့ ညီညီညွတ်ညွတ် ပြုလုပ်နိုင်ခဲ့တာလည်း ဖြစ်ပါတယ်။
