Border News Agency
မလေးရှား၊ဇူလိုင် ၁။
မလေးရှားနိုင်ငံ၊ပါးလစ် (Perlis) ပြည်နယ်နဲ့ ထရန်ဂါနူး(Terengganu) ပြည်နယ်မှာ လူဝင်မှုကြီးကြပ်ရေးဦးစီးဌာနက ရှောင်တခင်စစ်ဆင်ရေးတွေ ပြုလုပ်ခဲ့ရာတရားဝင်နေထိုင်ခွင့် အထောက်အထားမရှိတဲ့ မြန်မာနိုင်ငံသား စုစုပေါင်း ၁၆ ဦး ဖမ်းဆီးခံခဲ့ရတယ်လို့ သိရပါတယ်။
ပါးလစ်ပြည်နယ်မှာဇွန်လ ၃၀ ရက်နေ့က ဆောက်လုပ်ရေးလုပ်ငန်းခွင်တွေနဲ့ အလုပ်သမားတန်းလျားတွေကို ဝင်ရောက်စစ်ဆေးခဲ့ပြီး တရားဝင်ဗီဇာမရှိတဲ့ မြန်မာအမျိုးသား ၈ ဦးကို ဖမ်းဆီးကာ လူဝင်မှုကြီးကြပ်ရေးထိန်းသိမ်းရေးစခန်းကို ပို့ဆောင်ခဲ့ပါတယ်။
အဲဒီအပြင် ထရန်ဂါနူးပြည်နယ်မှာလည်း ဇွန်လ ၂၃ ရက်နေ့က လူနေအိမ်တွေနဲ့ စက်မှုဇုန်တွေကို စစ်ဆေးခဲ့ရာ အသက် ၇ နှစ်ကနေ ၄၃ နှစ်ကြားရှိတဲ့ မြန်မာနိုင်ငံသား အမျိုးသား ၅ ဦး၊အမျိုးသမီး ၁ ဦးနဲ့ ကလေးငယ် ၂ ဦး၊ စုစုပေါင်း ၈ ဦး ဖမ်းဆီးခံခဲ့ရတာပါ။
အဲဒီ ဖမ်းဆီးခံရသူအားလုံးကို မလေးရှားလူဝင်မှုကြီးကြပ်ရေးဥပဒေတွေနဲ့ အမှုဖွင့်အရေးယူထားပြီး အာဂျီးလ် (Ajil)ထိန်းသိမ်းရေးစခန်းအပါအဝင် သက်ဆိုင်ရာ စခန်းတွေမှာ ပိတ်လှောင်ကာ ဆက်လက်စစ်ဆေးနေတယ်လို့ သိရပါတယ်။
