Border News Agency
ထိုင်း၊ ဩဂုတ် ၂၂။
ထိုင်းနိုင်ငံရောက်အထောက်အထားမပြည့်စုံတဲ့ မြန်မာအလုပ်သမားလေးသိန်းနှစ်သောင်းကိုးထောင့်တရာ့ကိုးဆယ်နှစ်ဦးကို ဘယ်သူဘယ်ဝါဖြစ်ကြောင်း သက်သေခံလက်မှတ် (CI) အသစ်ထုတ်ပေးနိုင်ခဲ့တယ်လို့ အလုပ်သမားဝန်ကြီးဌာနက သြဂုတ်လ ၂၂ ရက်၊ဒီနေ့ထုတ်ပြန်ပါတယ်။
အဲဒီCI လက်မှတ်တွေကို စမုစခွန်၊စမုပရာကန်၊ဆူရတ်ဌာနီ၊ချင်းမိုင်ရှိ စခန်းလေးခုနဲ့ ကရာဘီမြို့ရှိ Mobile Unit တခုမှာ ပြီးခဲ့တဲ့ဖေဖော်ဝါရီလ ၁၇ ရက်မှ ဩဂုတ်လ ၁၆ ရက်အထိ ခြောက်လကြာတာဝန်ယူ ထုတ်ပေးခဲ့တာလို့ဆိုပါတယ်။
ခုလုပ်ငန်းစဉ်မှာ ပါဝင်ခဲ့ကြတဲ့ဝန်ထမ်းတွေကို အလုပ်သမားဝန်ကြီးဌာန ပြည်ထောင်စုဝန်ကြီးဦးခင်မောင်စိုးက ဩဂုတ်လ၂၁ ရက်နေ့မှာ နေပြည်တော်ရှိ လူမှုဖူလုံရေးအဖွဲ့ရုံးချုပ်မှာတွေ့ဆုံခဲ့ပါတယ်။
အဲဒီတွေ့ဆုံပွဲမှာ ပြည်ထောင်စုဝန်ကြီးက လုပ်ငန်းလွှဲပြောင်းလက်ခံတာနဲ့ စာရင်းဇယားတွေကိုစနစ်တကျ ဆောင်ရွက်ဖို့ မှာကြားခဲ့တယ်လို့ဆိုပါတယ်။
အဲဒီပြင်တာဝန်ထမ်းဆောင်နေချိန် ကြုံတွေ့ခဲ့ရတဲ့အခက်အခဲတွေနဲ့ သက်ဆိုင်ရာကဏ္ဍအလိုက်အကြံပြုချက်တွေကို ပြည့်စုံစွာတင်ပြဖို့လည်း တိုက်တွန်းခဲ့တယ်လို့ဆိုပါတယ်။
