Border News Agency
မြောက်ဦး၊ စက်တင်ဘာ ၁၀။
မြောက်ဦးခရိုင်မှာထောက်ခံစာတွေ လိမ်လည်တောင်းယူပြီးပြည်ပကိုထွက်ဖို့ ကြိုးစားခဲ့သူခုနှစ်ဦးကို အာရက္ခပြည်သူ့တော်လှန်ရေးအစိုးရက ထိန်းသိမ်းစိစစ်ပြီးနောက် စက်တင်ဘာလ၉ ရက်နေ့မှာ မိဘတွေဆီပြန်လွဲပေးခဲ့ပါတယ်။
ပြန်လွှဲခံရသူတွေထဲမှာ အမျိုးသားလေးဦးနဲ့ အမျိုးသမီးသုံးဦးစုစုပေါင်း ခုနှစ်ဦးပါဝင်ပြီး အဲဒီသူတွေဟာသက်ဆိုင်ရာအုပ်ချုပ်ရေးတာဝန်ရှိသူတွေဆီက ထောက်ခံစာတွေလိမ်ယူကာ နယ်စပ်ကို ကုန်ပစ္စည်းတွေချဖို့သွားတဲ့ပုံစံနဲ့ ပြည်ပကိုထွက်ချိန် လမ်းခုလတ်မှာ ဖမ်းဆီးခံခဲ့ရတာပါ။
အဲဒီခုနှစ်ဦးဟာ ရက္ခိုင်အမျိုးသားအဖွဲ့ချုပ်ကချမှတ်ထားတဲ့ အမျိုးသားကာကွယ်ရေးဆိုင်ရာ အရေးပေါ်ပြဋ္ဌာန်းချက် (NDEP) အရ ပြည်သူ့စစ် စစ်မှုထမ်းဖို့ အကျုံးဝင်သူတွေလည်းဖြစ်ကြပါတယ်။
အဲဒီ အခမ်းအနားမှာမြောက်ဦးခရိုင်ပါတီမှူးက ဆုံးမဩဝါဒစကားပြောကြားခဲ့ပြီး နောက်နောင် အခုလိုလိမ်လည်မှုတွေ ထပ်မဖြစ်အောင် ဝန်ခံကတိလက်မှတ်တွေရေးထိုးစေခဲ့ပါတယ်။
အာရက္ခပြည်သူ့အစိုးရဟာ ထိန်းချုပ်နယ်မြေတွေအတွင်း ထောက်ခံစာလိမ်လည်တောင်းယူပြီး ပြည်ပထွက်သူတွေကို စိစစ်ဖမ်းဆီးကာ သတိပေးကတိဝန်ခံချက်ယူပြီး မိဘတွေဆီပြန်အပ်ပေးတာတွေကိုဆောင်ရွက်နေပါတယ်။
