Border News Agency
မင်းတုန်း၊ စက်တင်ဘာ ၁၅။
မကွေးတိုင်း၊ မင်းတုန်းမြို့နယ်၊ ဇွန်းကျကျေးရွာကို အာဏာသိမ်းစစ်တပ်က စက်တပ်လေထီးတွေနဲ့ ဗုံးကြဲတိုက်ခိုက်ခဲ့တာကြောင့် ကလေးငယ်တွေနဲ့သက်ကြီးရွယ်အိုအပါအဝင် အရပ်သားခြောက်ဦးသေဆုံးပြီးငါးဦးဒဏ်ရာရခဲ့တယ်လို့ သရက်ခရိုင် အမှတ် ၄ ပြည်သူ့ကာကွယ်ရေးတပ်က စက်တင်ဘာလ ၁၄ ရက်၊မနေ့ကထုတ်ပြန်ပါတယ်။
အဲဒီသရက်မြို့နယ်၊ ကပစ ၁၂ ဘက်ကနေတက်လာတဲ့ စစ်တပ်ရဲ့စက်တပ်လေထီးသုံးစီးဟာ စက်တင်ဘာလ ၁၃ ရက်နေ့ကဇွန်းကျကျေးရွာအတွင်းကို ဗုံးရှစ် လုံးနဲ့တိုက်ခိုက်ခဲ့တာပါ။
အဲဒီတိုက်ခိုက်မှုကြောင့် ဇွန်းကျကျေးရွာမှ အသက်ခုနှစ်ဆယ်အရွယ်ဒေါ်ပစာ၊ အသက် တဆယ့်ခုနှစ်နှစ်အရွယ် မခင်ဝေဇင်မိုး၊ အသက်နှစ်ဆယ့်ငါးနှစ်အရွယ် မနွယ်နွယ်ဝင်း၊ အသက်တဆယ့်တနှစ်အရွယ် မထက်သဇင်လှိုင်၊အသက်တဆယ်နှစ်အရွယ် မငုဝါလှိုင်နဲ့ အသက်တဆယ့်ငါးနှစ်အရွယ် မောင်ကောင်းထက်ကျော်တို့ စုစုပေါင်းခြောက်ဦးသေဆုံးခဲ့ပါတယ်။
အဲဒီအပြင်အသက် ဆယ်နှစ်ကနေနှစ်ဆယ့်သုံးနှစ်အရွယ်ရှိ ဒေသခံငါးဦးလည်းဒဏ်ရာရသွားခဲ့ကြပါတယ်။
မင်းတုန်းမြို့နယ်အတွင်း တိုက်ပွဲဖြစ်ပွားတာမရှိဘဲ အရပ်သားပြည်သူတွေနေထိုင်ရာကျေးရွာတွေကို ရည်ရွယ်ချက်ရှိရှိလေကြောင်းတိုက်ခိုက်နေတာကြောင့် ဒေသခံတွေအနေနဲ့စစ်ဘေးအန္တရာယ်ကို သတိပြုနေထိုင်ကြဖို့လည်းအသိပေးထားပါတယ်။
