Border News Agency
ကစယ်ဒို၊နိုဝင်ဘာလ ၁၁။
တနင်္သာရီတိုင်း၊ ကစယ်ဒိုမြို့နယ်နဲ့လယ်မူလားမြို့နယ်မှာ အာဏာသိမ်းစစ်တပ်လေကြောင်းတိုက်ခိုက်လို့ အရပ်သားတဦးသေဆုံးပြီး နှစ်ဦးဒဏ်ရာရသွားခဲ့တယ်လို့ ကရင်အမျိုးသားအစည်းအရုံးမှ နိုဝင်ဘာလ ၁၁ရက်နေ့ထုတ်ပြန်ပါတယ်။
အဲဒီကစယ်ဒိုမြို့နယ်၊ တောင်ပျောက်ကျေးရွာအုပ်စု၊ ဝင်းကဖော်ကျေးရွာကို နိုဝင်ဘာလ ၁၀ ရက်၊ ညနေ ၃နာရီအချိန်ခန့်က အာဏာသိမ်းစစ်တပ်မှ K8W တိုက်လေယာဉ်နဲ့ ဗုံးကြဲတိုက်ခိုက်ခဲ့တာကြောင့် အရပ်သားတဦးဒဏ်ရာရသွားခဲ့တယ်လို့ ဆိုပါတယ်။
အဲဒီအပြင် လယ်မူလားမြို့နယ်၊ မဇောကျေးရွာအုပ်စု၊ ဖာနီကျေးရွာကိုစစ်ကြောင်းထိုးလာတဲ့ အာဏာသိမ်းစစ်တပ် (ခမရ-၅၅၆) တပ်ရင်းမှ နိုဝင်ဘာလ ၁၀ ရက်၊ မနက် ၁၀နာရီခွဲအချိန်က ဆိုင်ကယ်စီးနှင်းလာတဲ့အရပ်သားနှစ်ဦးကို သေနတ်နဲ့ပစ်ခတ်ခဲ့ရာ တဦးသေဆုံးခဲ့ပြီးတဦးမှာ ထိခိုက်ဒဏ်ရာရသွားခဲ့တယ်လို့ ဆိုပါတယ်။
အာဏာသိမ်းစစ်တပ်ဟာ မြိတ်ထားဝယ်ခရိုင်အတွင်းရှိ အပြစ်မဲ့အရပ်သားပြည်သူတွေနေထိုင်ရာနေရာတွေကို တိုက်ပွဲဖြစ်ပွားတာတွေမရှိဘဲ တိုက်လေယာဉ်၊ ဒရုန်း၊ လက်နက်ကြီးတွေနဲ့ ရည်ရွယ်ချက်ရှိရှိပစ်မှတ်ထားတိုက်ခိုက်နေပြီး အရပ်သားပြည်သူတွေကို ဖမ်းဆီးသတ်ဖြတ်တာတွေကို နေ့စဉ်နဲ့အမျှ ကျူးလွန်နေပါတယ်။
