Border News Agency
မကွေး၊ ဖေဖော်ဝါရီ ၂၈။
NUG ဝန်ကြီးချုပ်ရုံးအတွင်းဝန်နဲ့ပတ်သက်တဲ့ အမှုကိစ္စကြောင့် အမျိုးသားညီညွတ်ရေးအစိုးရနဲ့ ပူးပေါင်းဆောင်ရွက်မှုတွေရပ်တန့်ထားခဲ့တဲ့ CDM ကျန်းမာရေးကွန်ယက်ဟာ ဖေဖော်ဝါရီလ၂၇ ရက်နေ့မှာ အဲဒီကန့်သတ်ချက်ကို ပြန်လည်ရုပ်သိမ်းလိုက်ပြီလို့ ထုတ်ပြန်ပါတယ်။
အဲဒီကွန်ယက်ဘက်ကတောင်းဆိုထားတဲ့ အချက် ၆ ချက်အပေါ် NUG အစိုးရဘက်က အတတ်နိုင်ဆုံးကိုက်ညီအောင် လိုက်နာဆောင်ရွက်ပေးခဲ့သလို၊ နွေဦးတော်လှန်ရေးရဲ့ အဓိကထောက်တိုင်ဖြစ်တဲ့ CDM တွေရဲ့အခန်းကဏ္ဍကို အလေးထားလက်တွဲသွားမယ်လို့ ကတိပြုခဲ့တာကြောင့် အခုလို ပြန်လည်ပူးပေါင်းဖို့ ဆုံးဖြတ်ခဲ့တာလို့ဆိုပါတယ်။
NUG အစိုးရအနေနဲ့ CDM တွေနဲ့ ပြည်သူ့အသံကိုအလေးထားပြီး တာဝန်ယူမှု၊ တာဝန်ခံမှုရှိရှိ တုံ့ပြန်ဆောင်ရွက်ခဲ့တဲ့အပေါ် CDM ကျန်းမာရေးကွန်ယက်က ဝမ်းမြောက်ဝမ်းသာကြိုဆိုကြောင်းနဲ့ ရပ်တန့်ထားတဲ့လုပ်ငန်းစဉ်တွေကို အမြန်ဆုံးပြန်လည်စတင်သွားမယ်လို့ ဆိုပါတယ်။
အဲဒါကြောင့် အာဏာရှင်စနစ်အပြီးတိုင်ပပျောက်ဖို့နဲ့ ဖက်ဒရယ်ဒီမိုကရေစီ တည်ဆောက်ရေးအတွက် CDM တွေနဲ့ အစိုးရတစ်သားတည်းဖြစ်အောင် ယုံကြည်မှုတည်ဆောက်ပြီး တော်လှန်ရေးခရီးကို ဆက်လက်တိုက်ပွဲဝင်သွားမယ်လို့ အသိပေးထားပါတယ်။
