Border News Agency
ကွတ်ခိုင်၊မတ် ၂၁။
ရှမ်းပြည်မြောက်ပိုင်း၊ ကွတ်ခိုင်မြို့နယ်၊ နမ့်ဖတ်ကာကျေးရွာမှာ မတ်လ ၁၄ ရက်နေ့က နေအိမ်မီးလောင်မှုကိုသွားရောက်ကူညီတဲ့ ဒေသခံအမျိုးသားတဦး ပစ်ခတ်ခံရပြီး သေဆုံးသွားတယ်လို့ တအာင်းအမျိုးသမီးအဖွဲ့အစည်း (TWO) က ထုတ်ပြန်ပါတယ်။
နမ့်ဖတ်ကာရပ်ကွက် ၄ အတွင်း ဒရုန်းနဲ့ တိုက်ခိုက်ခံရလို့ နေအိမ်တလုံး မီးလောင်ခဲ့ရာ အဲဒီမီးကို သွားရောက်ငြိမ်းသတ်ဖို့ကြိုးစားတဲ့ ကိုနိုင်ထွန်းဟာ လမ်းမှာ MNDAA တပ်ဖွဲ့ဝင်တွေနဲ့ တိုးပြီး ဦးခေါင်းနောက်စေ့ကို စနိုက်ပါနဲ့ အပစ်ခံခဲ့ရတယ်လို့ဆိုပါတယ်။
သေဆုံးသူရဲ့ ဇနီးဖြစ်သူက မျက်မြင်သက်သေတွေရဲ့ ပြောပြချက်အရ ကိုနိုင်ထွန်းဝတ်ဆင်ထားတဲ့ အဖြူရောင်အင်္ကျီနဲ့ ညာဘက်လက်မောင်းက တက်တူးအမှတ်အသားကို ကြည့်ပြီး သူ့ခင်ပွန်းဖြစ်တာကို အတည်ပြုနိုင်ခဲ့တာပါ။
ဒါပေမယ့် ရုပ်အလောင်းကို ပြန်လည်ရရှိဖို့ သွားရောက်တောင်းဆိုခဲ့ပေမယ့်ပြန်မပေးခဲ့ဘူးလို့ ဆိုပါတယ်။
အဲဒီအပြင် ကိုနိုင်ထွန်းရဲ့ ရုပ်အလောင်းကို မိသားစုဆီပြန်မပေးတဲ့အပြင် အလောင်းနဲ့အတူသူစီးလာတဲ့ ဆိုင်ကယ်နဲ့ လက်ကိုင်ဖုန်းကိုပါ မီးရှို့ဖျက်ဆီးပစ်လိုက်တယ်လို့ ဆိုပါတယ်။
မတ်လ ၁၄ ရက်နေ့ကစပြီး MNDAA အဖွဲ့ဟာ တအာင်းတပ်မတော် (TNLA) ထိန်းချုပ်ထားတဲ့ ကွတ်ခိုင်မြို့ကို အင်အားအလုံးအရင်းနဲ့ ဝင်ရောက်တိုက်ခိုက်နေတာဖြစ်ပြီး ဒရုန်းဗုံးနဲ့ လက်နက်ကြီးတွေကြောင့် ထိခိုက်သေဆုံးရတဲ့ ဒေသခံအရေအတွက်ကိုလည်း ဆက်လက်စုံစမ်းနေတယ်လို့ သိရပါတယ်။
