Border News Agency
ပုဏ္ဏားကျွန်း၊ဧပြီ ၁၅ ။
ပုဏ္ဏားကျွန်းမြို့နယ်၊ ကျောက်ဆိပ်ရွာမှာ ပြီးခဲ့တဲ့ ဖေဖော်ဝါရီလနှောင်းပိုင်းက အရက်မူးပြီးအချင်းချင်းစကားများရာကနေ လူသတ်မှုတခုဖြစ်ပွားခဲ့တယ်လို့ အာရက္ခပြည်သူ့တော်လှန်ရေးအစိုးရရဲ့ မှုခင်းသတင်းထုတ်ပြန်ချက်အရသိရပါတယ်။
အဲဒီကျောက်ဆိပ်ရွာက လွင်မိုးသူနဲ့ ဇော်ဝင်းတို့ဟာ ရွာဘုန်းကြီးကျောင်းဝင်းအတွင်း အရက်အတူသောက်နေရင်းစကားများခဲ့ကြရာကနေ ဇော်ဝင်းကကျောက်တုံးနဲ့ ထုသတ်ခဲ့တာကြောင့် လွင်မိုးသူဟာအခင်းဖြစ်နေရာမှာတင် သေဆုံးသွားခဲ့တာပါ။
အဲဒီလူသတ်မှုနဲ့ပတ်သက်ပြီး တရားခံဖြစ်သူဇော်ဝင်းကို တရားဥပဒေစိုးမိုးရေးနဲ့ ပြည်သူ့လုံခြုံရေးဌာန (ဒီလပ်) က ဖေဖော်ဝါရီလ၂၇ ရက်၊ မနက်အစောပိုင်းမှာတင် ညတွင်းချင်းဖမ်းဆီးရမိခဲ့ပါတယ်။
အဲဒီတရားခံကို ရာဇသတ်ကြီးပုဒ်မ ၃၀၂ နဲ့ အမှုဖွင့်ထားပြီး ဥပဒေလုပ်ထုံးလုပ်နည်းတွေနဲ့အညီ ထိရောက်စွာအရေးယူနိုင်ဖို့ ဆောင်ရွက်နေတယ်လို့ ဆိုပါတယ်။
အာရက္ခပြည်သူ့တော်လှန်ရေးအစိုးရအနေနဲ့ အခုလိုမူးယစ်ရမ်းကားမှုတွေကြောင့် ဖြစ်ပွားတဲ့ရာဇဝတ်မှုတွေ လျော့နည်းသွားအောင် ဥပဒေအသိပညာပေးတာတွေအပြင် လိုင်စင်မဲ့အရက်ရောင်းချမှုတွေကိုလည်း တားဆီးအရေးယူသွားမယ်လို့လည်းဆိုပါတယ်။
