Border News Agency
ကရင်နီ၊ ဧပြီ ၁၇။
ကရင်နီပြည်ထဲက အကျဉ်းထောင်နဲ့ အကျဉ်းစခန်းတွေမှာရှိတဲ့ အကျဉ်းသား ၂၃၄ ဦးကို မြန်မာနှစ်သစ်ကူးအထိမ်းအမှတ်အနေနဲ့ ဒီနေ့မှာ လွတ်ငြိမ်းခွင့်ပေးလိုက်တယ်လို့ ကရင်နီပြည်ကြားကာလအုပ်ချုပ်ရေးကောင်စီ (IEC) က ထုတ်ပြန်ပါတယ်။
အဲဒီလွတ်ငြိမ်းခွင့်ပေးလိုက်တဲ့အထဲမှာ အကျဉ်းသား၊အကျဉ်းသူ ၂၅ ဦးကိုတော့ လူသားချင်းစာနာမှုအရ လုံးဝလွတ်ငြိမ်းခွင့်ပေးလိုက်တာဖြစ်ပြီး ကျန်တဲ့ ၂၀၉ ဦးကိုတော့ ပြစ်ဒဏ်လျှော့ပေါ့ခွင့် ပေးလိုက်တာပါ။
ဒီကနေ့ IEC ရဲ့ လွတ်ငြိမ်းချမ်းသာခွင့်ပေးခဲ့တဲ့ အရေအတွက်ဟာ ပြီးခဲ့တဲ့နှစ်တွေကထက် ပိုများလာတာဖြစ်ပြီး နှစ်ဆန်းတရက်နေ့မှာ အခုလို လွှတ်ပေးခဲ့တာလည်း ဖြစ်ပါတယ်။
ကရင်နီပြည်ကြားကာလအုပ်ချုပ်ရေးကောင်စီ (IEC) ဟာ သူတို့ထိန်းချုပ်ထားတဲ့ နယ်မြေတွေထဲက အကျဉ်းသားတွေကို စနစ်တကျ စီမံခန့်ခွဲနေတာဖြစ်ပြီး အခုလို လွတ်ငြိမ်းခွင့်ကိုလည်း ပုံမှန်လုပ်ဆောင်ပေးနေတာလို့ဆိုပါတယ်။
