Border News Agency
နေပြည်တော်၊ ဧပြီ ၁၈။
နိုင်ငံတော်ဖွံ့ဖြိုးတိုးတက်ဖို့နဲ့ တည်ငြိမ်အေးချမ်းဖို့အတွက် အခြေခံအကျဆုံး လိုအပ်ချက်ဟာ ပညာရေးဖြစ်တာကြောင့် အစိုးရအနေနဲ့ ပညာရေးကဏ္ဍကို ဆက်လက်မြှင့်တင် ဆောင်ရွက်ပေးသွားမယ်လို့ သမ္မတတုမင်းအောင်လှိုင်ကပြောပါတယ်။
ပညာရည်နိမ့်ပါးသူတွေနဲ့ နိုင်ငံတော်ကို တိုးတက်အောင်လုပ်ဖို့ ခက်ခဲမှာဖြစ်ကြောင်းနဲ့ အနာဂတ်အတွက် အင်အားသစ်ဖြစ်တဲ့ ကျောင်းသား၊ကျောင်းသူတွေဟာ ပညာရေးအပြင် စိတ်ဓာတ်နဲ့ အကျင့်စာရိတ္တတွေပါ ကောင်းမွန်တဲ့ လူတော်လူကောင်းတွေဖြစ်ဖို့ လိုအပ်တယ်လို့ဆိုပါတယ်။
လူငယ်တွေအနေနဲ့ အတတ်ပညာသာမက အမှားအမှန် ခွဲခြားနိုင်စွမ်းရှိတဲ့ အသိပညာပါ ထက်မြက်ဖို့ လိုအပ်ပြီး ဘက်စုံထူးချွန်တဲ့ လူငယ်တွေဖြစ်လာအောင် ဝိုင်းဝန်းပြုစုပျိုးထောင်ပေးကြဖို့ကိုလည်း အလေးအနက် တိုက်တွန်းထားပါတယ်။
ဒါပေမယ့်မြေပြင်မှာတော့ စစ်မှုထမ်းဥပဒေကြောင့် ပညာသင်ရမယ့်အရွယ်တွေဟာစာသင်ခန်းတွေနဲ့ ဝေးကွာပြီး စစ်မြေပြင်တွေဆီ ရောက်နေကြရပါတယ်။
ဒီလိုအတင်းအကျပ် ခေါ်ယူမှုတွေကြောင့် လူငယ်အများစုဟာ ပညာရေးကိုစွန့်လွှတ်ပြီး ပြည်ပထွက်ခွာတာနဲ့ တိမ်းရှောင်တာတွေ လုပ်ဆောင်နေရတာပါ။
ဒါ့အပြင် တိုက်ပွဲဖြစ်ပွားရာ ဒေသတွေမှာ ကျောင်းတွေပိတ်ထားရသလို၊ စစ်ဘေးရှောင်နေရတဲ့ ကလေးငယ်တွေအတွက် ဘေးကင်းတဲ့ စာသင်ဝိုင်းတွေဟာလည်းရှားပါးနေပါတယ်။
သမ္မတတုက ပညာရေးကို အခြေခံပြီး နိုင်ငံတည်ဆောက်မယ်လို့ ဆိုပေမယ့် မြေပြင်က ပဋိပက္ခတွေနဲ့ စစ်မှုထမ်းခေါ်ယူမှုတွေဟာ မျိုးဆက်သစ်တွေရဲ့ အနာဂတ်ကို ခြိမ်းခြောက်နေတယ်လို့ မိဘတွေနဲ့ ပညာရေးဝန်ထမ်းတွေက ထောက်ပြနေကြပါတယ်။
