Border News Agency
နေပြည်တော်၊ ဇွန် ၁၀။
ပြည်ထောင်စုအစိုးရအဖွဲ့အစည်းအဝေးအတွင်း သမ္မတတုက ပြောကြားရာမှာ လက်ရှိအစိုးရဟာ ဒီမိုကရေစီလမ်းကြောင်းပေါ်မှာ ခိုင်ခိုင်မာမာနဲ့ အရှိန်အဟုန်ယူပြီး လျှောက်လှမ်းနေတာကြောင့် အရာရာကို စမ်းတဝါးဝါး လုပ်ဆောင်နေတာ မဟုတ်ဘူးလို့ထည့်သွင်းပြောဆိုခဲ့ပါတယ်။
အဲဒီအပြင်လုံခြုံရေး စစ်ဆေးမှုတွေ လုပ်ဆောင်ရာမှာလည်း ပြည်သူတွေအတွက် ဝန်ထုပ်ဝန်ပိုး မဖြစ်စေဖို့နဲ့ တရားမဝင် ငွေကြေးကောက်ခံတာမျိုး မရှိစေဖို့ တာဝန်ရှိသူတွေကို သတိပေးမှာကြားခဲ့ပါတယ်။
နိုင်ငံ့ဝန်ထမ်းတွေအနေနဲ့လည်း အဂတိတရားကင်းရှင်းပြီး တာဝန်ကျေပွန်ဖို့နဲ့ လုပ်ပိုင်ခွင့်ကို အလွဲသုံးစားမလုပ်ဖို့ တိုက်တွန်းခဲ့ပါတယ်။
နိုင်ငံတနိုင်ငံအတွက် စီးပွားရေးခိုင်မာဖို့နဲ့ တည်ငြိမ်အေးချမ်းဖို့က အဓိကဖြစ်တာကြောင့် ပြည်သူတွေရဲ့ လူမှုစီးပွားဘဝ ဖွံ့ဖြိုးတိုးတက်ရေးအတွက် အစိုးရအဖွဲ့ဝင်တွေနဲ့ တာဝန်ရှိသူတွေအားလုံး ဝိုင်းဝန်းကြိုးပမ်းဆောင်ရွက်သွားဖို့ သမ္မတတုက တိုက်တွန်းခဲ့ပါတယ်။
ခုအစည်းအဝေးကို ဒုတိယသမ္မတတွေ၊ ပြည်ထောင်စုဝန်ကြီးတွေနဲ့ တိုင်းဒေသကြီး/ပြည်နယ် ဝန်ကြီးချုပ်တွေ တက်ရောက်ခဲ့ကြပါတယ်။
သမ္မတတုက ဒီလိုပြောဆိုချက်တွေရှိနေပေမယ့် မြေပြင်မှာတော့ လုံခြုံရေးစစ်ဆေးမှုတွေကြောင့် ခရီးသွားလာရေးနဲ့ ကုန်စည်စီးဆင်းမှုတွေမှာ ကြန့်ကြာမှုတွေရှိနေဆဲဖြစ်သလို လူမှုစီးပွားရေးဆိုင်ရာ အခက်အခဲတွေနဲ့ ငွေကြေးဖောင်းပွမှုဒဏ်ကို ပြည်သူတွေ ဆက်လက်ရင်ဆိုင်နေရဆဲဖြစ်ပါတယ်။
