Border News Agency
အမေရိကန်၊ ဧပြီ ၃၀။
အမေရိကန်သမ္မတထရမ့်နဲ့ ဥရောပနိုင်ငံတွေကြား ဆက်ဆံရေးတင်းမာလာတာကြောင့် ဥရောပခေါင်းဆောင်တွေဟာ နေတိုး (NATO) အဖွဲ့အပေါ်မှာပဲ အားမကိုးတော့ဘဲဥရောပသမဂ္ဂရဲ့ကိုယ်ပိုင်အပြန်အလှန်ကာကွယ်ရေးဥပဒေကို အသက်သွင်းဖို့ ကြိုးပမ်းလာတယ်လို့ သိရပါတယ်။
အမေရိကန်နဲ့ အစ္စရေးတို့ အီရန်ကို တိုက်ခိုက်တဲ့စစ်ပွဲမှာ ဥရောပမဟာမိတ်တွေဘက်က ထောက်ခံမှုအားနည်းတယ်ဆိုပြီး ထရမ့်က ဝေဖန်ခဲ့သလို နေတိုးအဖွဲ့ကိုလည်း စက္ကူကျားလို့ ပြစ်တင်ရှုံ့ချခဲ့တာကြောင့် အခုလို အက်ကြောင်းထလာတာ ဖြစ်ပါတယ်။
ဒါ့အပြင် စစ်ပွဲကို ဝေဖန်တဲ့ စပိန်နိုင်ငံကို နေတိုးအဖွဲ့ကနေ ထုတ်ပယ်ဖို့အထိ အမေရိကန်ဘက်က စဉ်းစားနေတယ်ဆိုတဲ့ သတင်းတွေ ထွက်ပေါ်လာပြီးနောက်မှာ ဥရောပနိုင်ငံတွေဟာ အမေရိကန်မပါတဲ့ ကိုယ်ပိုင်ကာကွယ်ရေးစနစ်တခု လိုအပ်နေပြီဆိုတာကို ပိုပြီးသဘောပေါက်လာကြပါတယ်။
အဲဒီပြင်သစ်သမ္မတ မက်ခရွန်အပါအဝင် ဥရောပခေါင်းဆောင်တွေက အဖွဲ့ဝင်နိုင်ငံတခု တိုက်ခိုက်ခံရရင် ကျန်တဲ့နိုင်ငံတွေက ဝိုင်းဝန်းကူညီရမယ့် Article 42.7 ကို လက်တွေ့အသုံးချနိုင်အောင် လမ်းညွှန်ချက်တွေ စတင်ရေးဆွဲနေပြီလို့ ဆိုပါတယ်။
စစ်ရေးလေ့လာသူတွေကတော့ ဥရောပနိုင်ငံတွေဟာ သူတို့ရဲ့ စစ်သုံးစရိတ်တွေကို တိုးမြှင့်နေကြပြီး အနာဂတ်မှာ အမေရိကန်ရဲ့ အကာအကွယ်မပါဘဲ ကိုယ်တိုင်ရပ်တည်နိုင်ဖို့အတွက် အလေးအနက် ပြင်ဆင်နေကြတယ်လို့ သုံးသပ်နေကြပါတယ်။
