Border News Agency
တရုတ်၊ မေ ၇။
မြန်မာနိုင်ငံကနေတရုတ်နိုင်ငံကို ဆန်နဲ့ ဆန်ကွဲ တင်ပို့လိုတဲ့ ကုမ္ပဏီအသစ်တွေအနေနဲ့ စိတ်ဝင်စားမှု အဆိုပြုလွှာ (EOI) တင်သွင်းနိုင်ပြီလို့ စိုက်ပျိုးရေးဦးစီးဌာနက မေလ ၆ ရက်၊ မနေ့ကထုတ်ပြန်လိုက်ပါတယ်။
အဲဒီတင်ပို့ခွင့်ဟာ မြန်မာနဲ့ တရုတ်ကြား ချုပ်ဆိုထားတဲ့ အပင်ကျန်းမာရေးဆိုင်ရာ သဘောတူစာချုပ် (SPS Protocol) ပါ စည်းကမ်းချက်တွေနဲ့အညီ နှစ်စဉ် စိစစ်မှတ်ပုံတင်ပေးသွားမှာလို့ဆိုပါတယ်။
အခုဖိတ်ခေါ်မှုမှာ အရင်က ခွင့်ပြုချက်ရထားပြီးသား ကုမ္ပဏီတွေ မပါဝင်ဘဲ ကုမ္ပဏီအသစ်တွေကိုပဲ သီးသန့် ခွင့်ပြုပေးမှာပါ။
လျှောက်ထားလိုတဲ့ ကုမ္ပဏီတွေဟာ Hard Copy ရော Soft Copy ပါ ပြင်ဆင်ပြီး လာမယ့် ဇွန်လ ၃၀ ရက်နေ့ နောက်ဆုံးထားပြီး လျှောက်ထားရမှာ ဖြစ်ပါတယ်။
အဲဒီလျှောက်လွှာပုံစံတွေကိုတော့ စိုက်ပျိုးရေးဦးစီးဌာနနဲ့ နည်းပညာရပ်ဆိုင်ရာ လုပ်ငန်းအဖွဲ့တွေဆီမှာ ရယူနိုင်ပါတယ်။
လျှောက်လွှာတွေကို ရန်ကုန်မြို့မှာရှိတဲ့ သီးနှံကာကွယ်ရေးဌာနခွဲ ဒါမှမဟုတ် မြန်မာနိုင်ငံ ဆန်စပါးအသင်းချုပ် (UMFCCI) ရုံးတွေမှာ တင်ပြနိုင်သလို သက်ဆိုင်ရာ ဝဘ်ဆိုဒ်တွေကနေလည်း ဒေါင်းလုဒ်ယူနိုင်တယ်လို့ သိရပါတယ်။
အဲဒီအပြင်အသေးစိတ် သိလိုတာတွေရှိရင်တော့ စိုက်ပျိုးရေးဦးစီးဌာနရဲ့ ဖုန်းနဲ့ အီးမေးလ်တွေကနေတဆင့် တိုက်ရိုက် ဆက်သွယ်မေးမြန်းနိုင်တယ်လို့လည်း ကြေညာထားပါတယ်။
