Border News Agency
ဖိလစ်ပိုင်၊မေ ၁၁။
ဖိလစ်ပိုင်နိုင်ငံ ဆီဗူးမြို့မှာကျင်းပတဲ့ ၄၈ ကြိမ်မြောက်အာဆီယံထိပ်သီးအစည်းအဝေးမှာ မြန်မာ့အရေးနဲ့ပတ်သက်ပြီး ဘုံသဘောတူညီချက် ၅ ချက်ကိုပဲ အဓိကမူဝါဒအဖြစ် ဆက်ကိုင်စွဲသွားမယ်လို့ အာဆီယံခေါင်းဆောင်တွေက ဆုံးဖြတ်လိုက်ပါတယ်။
မြန်မာပြည်မှာ အကြမ်းဖက်မှုတွေ ပိုများလာပြီး လူသားချင်းစာနာမှု အခြေအနေတွေ တိုးတက်မှုမရှိတာကိုလည်း တော်တော်လေး စိုးရိမ်နေကြပါတယ်။
အာဏာသိမ်းစစ်တပ်ကအရပ်သားတွေနဲ့ အများပြည်သူဆိုင်ရာ နေရာတွေကိုတိုက်ခိုက်နေတာကို အာဆီယံက ပြင်းပြင်းထန်ထန် ရှုတ်ချလိုက်ပြီး အားလုံးပါဝင်တဲ့ နိုင်ငံလုံးဆိုင်ရာ ဆွေးနွေးပွဲတွေဖြစ်လာဖို့ အခြေအနေကောင်းတွေ ဖန်တီးကြဖို့ တိုက်တွန်းထားပါတယ်။
တဖက်မှာလည်း AHA Centre ကနေတဆင့် အကူအညီတွေပေးနိုင်တာကိုတော့ အပြုသဘောဆောင်တဲ့ တိုးတက်မှုအဖြစ် မှတ်တမ်းတင်ထားပါတယ်။
နိုင်ငံတော်သမ္မတ ဦးဝင်းမြင့်အပါအဝင် အကျဉ်းသား ၅,၀၀၀ ကျော် လွှတ်ပေးတာနဲ့ လူထုခေါင်းဆောင် ဒေါ်အောင်ဆန်းစုကြည်ကို နေအိမ်အကျယ်ချုပ် ပြောင်းရွှေ့ပေးတာတွေကို အာဆီယံက ကြိုဆိုလိုက်ပါတယ်။
ဒါပေမယ့် ကျန်နေသေးတဲ့ နိုင်ငံရေးအကျဉ်းသားအားလုံးကိုပါ အမြန်ဆုံးပြန်လွှတ်ပေးဖို့ ထပ်လောင်းတောင်းဆိုထားပါတယ်။
အဲဒီ အာဆီယံအစည်းအဝေးမှာ အာဏာသိမ်းစစ်တပ်ရဲ့ကိုယ်စားလှယ်ကို လူကိုယ်တိုင် တက်ရောက်ခွင့်ပြုဖို့ ထိုင်းနိုင်ငံခြားရေးဝန်ကြီးက တင်ပြခဲ့ပေမယ့် စင်ကာပူနိုင်ငံခြားရေးဝန်ကြီးက အပြင်းအထန် ကန့်ကွက်ခဲ့တာကြောင့်လူကိုယ်တိုင် တက်ရောက်ခွင့် မရခဲ့ပါဘူး။
ရှေ့ဆက်ပြီးတော့လည်း မြန်မာ့အရေးကို ရေရှည်ကိုင်တွယ်နိုင်မယ့် အထူးသံတမန်တဦး ခန့်အပ်နိုင်ဖို့အတွက် လုပ်ပိုင်ခွင့်နဲ့ ရန်ပုံငွေကိစ္စတွေကို အာဆီယံအဆင့်မြင့်အရာရှိတွေကြား ဆက်လက်ညှိနှိုင်းသွားမယ်လို့ သိရပါတယ်။
