Border News Agency
မီဇိုရမ်၊ မေ ၂၇။
မီဇိုရမ်ပြည်နယ်၊ ဆာ့ချစ်ပ်ခရိုင်၊ လောင်ကောလ်နယ်မြေထဲမှာ မေလ ၂၆ ရက်၊ မနက်ပိုင်းက မြန်မာနိုင်ငံသား ၂ ဦးကို လက်နက်ခဲယမ်းတွေ၊ ဘိန်းဖြူအများအပြားနဲ့အတူ နယ်ခြားစောင့်လုံခြုံရေးတပ်ဖွဲ့ (BSF) နဲ့ ရဲပူးပေါင်းအဖွဲ့က ဖမ်းဆီးရမိခဲ့တယ်လို့ ဒေသတွင်းမီဒီယာတွေမှာဖော်ပြပါတယ်။
အဲဒီပူးပေါင်းအဖွဲ့ဟာ မေလ ၂၅ ရက်နေ့ကတည်းက လောင်ကောလ်နယ်မြေထဲမှာ ကြိုတင်စောင့်ဆိုင်းခဲ့ကြတာဖြစ်ပါတယ်။
အဲဒီနောက်မေလ ၂၆ ရက်၊ မနက် ၉ နာရီအချိန်ခန့်မှာ လက်ဖက်စိုက်ခင်းအနီး Kenbo 125 ဆိုင်ကယ်နဲ့မောင်းနှင်လာတဲ့ သူတို့ ၂ ဦးကိုတားဆီးစစ်ဆေးရာကနေ ဖမ်းဆီးရမိခဲ့တာပါ။
သူတို့ဆီမှ ကာလတန်ဖိုးဘိန်းဖြူဘူး ၉၀ ကျော် (အလေးချိန် ၁.၁၂၄ ကီလိုဂရမ်ခန့်) ကို သိမ်းဆည်းရမိခဲ့ပါတယ်။
အဲဒီအပြင်သေနတ် ၁ လက်၊ ကျည်ဆန် ၇ တောင့်နဲ့ မိုဘိုင်းလ်ဖုန်း ၃ လုံးတို့ကိုပါ သက်သေခံပစ္စည်းအဖြစ်သိမ်းဆည်းရမိခဲ့တယ်လို့ ဆိုပါတယ်။
အဲဒီဖမ်းဆီးရမိသူတွေဟာ ချင်းပြည်၊ ထန်တလန်မြို့နယ်၊ ဒေါန်ရွာက ဘိန်းဖြူပိုင်ရှင်လို့ယူဆရသူ ကက်ဆန်းထန်း (Cak Sang Thang) နဲ့ ရုအာခွားရွာက ရော်ဘင်ဆင် (Robinson) တို့ဖြစ်ကြပါတယ်။
အဲဒီမူးယစ်ဆေးဝါး၊ လက်နက်ခဲယမ်းတွေနဲ့အတူ ဖမ်းဆီးရမိခဲ့တဲ့မြန်မာနိုင်ငံသား ၂ ဦးကို သက်ဆိုင်ရာဥပဒေအရ ထိရောက်စွာအရေးယူနိုင်ဖို့ ဆာ့ချစ်ပ်ရဲစခန်းမှာ ထိန်းသိမ်းစစ်ဆေးနေတယ်လို့ဆိုပါတယ်။
