Border News Agency
သြစတြေးလျ၊ဇွန် ၂၀။
ဇွန်လ ၁၉ ရက်နေ့မှာ ကျရောက်တဲ့ ဒေါ်အောင်ဆန်းစုကြည်ရဲ့ ၈၁ နှစ်ပြည့် မွေးနေ့အထိမ်းအမှတ်အဖြစ် ဒေါ်အောင်ဆန်းစုကြည်အပါအဝင် မတရားဖမ်းဆီးခံထားရတဲ့ နိုင်ငံရေးအကျဉ်းသားအားလုံးကို ချက်ချင်းပြန်လွှတ်ပေးဖို့ ဩစတြေးလျအစိုးရ၊ ဆွစ်ဇာလန်အစိုးရနဲ့ အာဆီယံဒေသတွင်းက လွှတ်တော်အမတ်တွေက ပြိုင်တူတောင်းဆိုလိုက်ပါတယ်။
သြစတြေးလျက ဒေါ်အောင်ဆန်းစုကြည်နဲ့တကွ မတရားထိန်းသိမ်းခံထားရသူတွေ အားလုံးလွတ်မြောက်ဖို့ ထပ်မံတောင်းဆိုထားပြီး ဒေါ်အောင်ဆန်းစုကြည်အနေနဲ့ သူမရဲ့မိသားစု၊ ဥပဒေအကြံပေးတွေနဲ့ တွေ့ဆုံခွင့်အပြင် လုံလောက်တဲ့ ကျန်းမာရေးစောင့်ရှောက်မှုတွေကိုလည်း မပျက်မကွက် ရရှိရမယ်လို့ ဆိုထားပါတယ်။
အဲဒီအပြင် ဆွစ်ဇာလန်သံရုံးကလည်း မြန်မာနိုင်ငံမှာ မတရားဖမ်းဆီးခံထားရတဲ့ အကျဉ်းသားအားလုံး လွတ်မြောက်ရေးအတွက် ထပ်လောင်းတောင်းဆိုထားပြီး အကြမ်းဖက်မှုတွေရပ်တန့်ကာ အာဆီယံဘုံသဘောတူညီချက် ၅ ချက်အတိုင်း ဆောင်ရွက်သွားဖို့တိုက်တွန်းထားပါတယ်။
နောက်ပြီးဩစတြေးလျ၊ ထိုင်း၊ မလေးရှား၊ အင်ဒိုနီးရှား၊ ဖိလစ်ပိုင် အပါအဝင် နိုင်ငံပေါင်း ၁၀ နိုင်ငံက လွှတ်တော်အမတ် ၁၃၄ ဦးကလည်း အာဆီယံလူ့အခွင့်အရေးဆိုင်ရာလွှတ်တော်အမတ်များအဖွဲ့ (APHR) ကနေတဆင့် အာဏာသိမ်းစစ်တပ်ဆီအိတ်ဖွင့်ပေးစာတစောင် ပေးပို့ကာ ဒေါ်အောင်ဆန်းစုကြည်နဲ့နိုင်ငံရေးအကျဉ်းသားတွေကို ခြွင်းချက်မရှိ လွှတ်ပေးဖို့ တောင်းဆိုခဲ့ကြပါတယ်။
အဲဒီအိတ်ဖွင့်ပေးစာမှာ နောင်လာမယ့် ဆွေးနွေးမှုတွေမှာ အာဏာသိမ်းစစ်တပ်ဘက်က ဒေါ်အောင်ဆန်းစုကြည်ကို လူထုရှေ့မှောက်တရားဝင်ထုတ်ပြရမှာဖြစ်ပြီး အာဆီယံအနေနဲ့လည်း သူတို့နဲ့ဆက်ဆံရာမှာ ကတိပြုထားတဲ့ ဘုံသဘောတူညီချက် ၅ ချက်အတိုင်းသာ ကန့်သတ်ချက်ထား ဆက်ဆံဖို့တိုက်တွန်းထားပါတယ်။
