​Border News Agency
ထိုင်း၊ဇွန် ၂၄။

​ထိုင်းနိုင်ငံ၊ချင်းမိုင်မြို့မှာ လိုင်စင်မရှိဘဲ တရားမဝင် ခရီးသွားလုပ်ငန်း လုပ်ကိုင်နေတဲ့ “Win Win Express”ပေ့ချ်ပိုင်ရှင် မြန်မာအမျိုးသမီးတဦးကို ထိုင်းရဲတပ်ဖွဲ့က ဖမ်းဆီးလိုက်ပါတယ်။

​သူမက ဆိုရှယ်မီဒီယာပေါ်မှာ ချင်းမိုင် VIP ခရီးစဉ်တွေကို မြန်မာလို ကြော်ငြာပြီး ခရီးသည်တွေကို လိုက်ပို့ပေးနေတာပါ။

ပြီးခဲ့တဲ့ ဇွန်လ ၂၂ ရက်နေ့က ဒွိုင်စုထက်ဘုရားမှာ ခရီးသည် ၃ ယောက်ကို လိုက်ပို့နေတုန်း ရဲတွေက ဝင်စစ်လိုက်တော့မှ လိုင်စင်မဲ့ လုပ်စားနေတာကို မိသွားတာဖြစ်ပါတယ်။

​သူမမှာ ခရီးသွားလုပ်ငန်း လိုင်စင်ရော၊ ဧည့်လမ်းညွှန် လိုင်စင်ပါ မရှိဘဲနဲ့ ကုမ္ပဏီပိုင်ရှင်ရော၊ ဂိုက်ပါ တစ်ယောက်တည်း လုပ်ကိုင်နေတာ ဖြစ်ပါတယ်။

​အခုဆိုရင် သူမကို လိုင်စင်မဲ့ ခရီးသွားလုပ်ငန်း လုပ်ကိုင်မှု၊ အလုပ်လုပ်ခွင့်လက်မှတ် (Work Permit) မရှိဘဲ အလုပ်လုပ်မှုတွေနဲ့ အမှုဖွင့်ထားပြီး ရဲစခန်းမှာ စစ်ဆေးနေပါတယ်။