Border News Agency
မလှိုင်၊ ဇူလိုင် ၃။
မန္တလေးတိုင်း၊ မလှိုင်မြို့နယ် အိမ်ကြီးတောရွာတိုက်ပွဲအတွင်း အာဏာသိမ်းစစ်တပ်တပ်ဖွဲ့ဝင်ဆယ်ဦး အရှင်ဖမ်းမိခဲ့တယ်လို့ ပြည်သူ့ကာကွယ်ရေးတပ်မတော် -PDFက ဇူလိုင်လ ၃ရက်နေ့က ထုတ်ပြန်ပါတယ်။
မလှိုင်မြို့နယ်၊ အိမ်ကြီးတောရွာတွင်း စစ်ကြောင်းထိုးလာတဲ့စစ်တပ်စစ်ကြောင်းကို ဇူလိုင်လ ၂ရက်၊ မနက် ၁၁ နာရီ ၂၀မိနစ်မှ နေ့လည် ၂နာရီ ၃၀မိနစ်အချိန်ခန့်အထိ တော်လှန်ရေးပူးပေါင်းတပ်တွေမှ ဝင်ရောက်တိုက်ခဲ့တယ်လို့ဆိုပါတယ်။
တိုက်ပွဲအတွင်း စစ်တပ်ဘက်မှ Mi-35 တိုက်ခိုက်ရေးရဟတ်ယာဉ်နှစ်စီးနဲ့ပစ်ကူတိုက်ခိုက်ခဲ့ပေမယ့် တော်လှန်ရေးတပ်တွေခုခံတိုက်ခိုက်မှုကြောင့် စစ်တပ်ဘက်မှ အာဏာသိမ်းစစ်သားနှစ်ဦးသေဆုံးခဲ့ပြီး စစ်သုံ့ပန်းဆယ်ဦးလက်နက်ချအညံ့ခံခဲ့တယ်လို့ဆိုပါတယ်။
အဲဒီအပြင် စစ်တပ်ဘက်မှ လက်နက်နဲ့ စိန်ပြောင်းမျိုးစုံ ၂၀ လက်၊ ဒရုန်းနဲ့ ဆက်စပ်ပစ္စည်း၊ ခဲယမ်းပစ္စည်းမျိုးစုံ သိမ်ဆည်းရမိခဲ့တယ်လို့ဆိုပါတယ်။
တိုက်ခိုက်မှုကို မန္တလေးတိုင်းစစ်ဌာန၊ မြင်းခြံခရိုင်စစ်ဌာနကွပ်ကဲမှူနဲ့ မြင်းခြံခရိုင်စစ်ဌာန တပ်ရင်းတွေ၊ မိတ္ထီလာခရိုင် အမှတ်၂တပ်ရင်း၊ မြင်းခြံခရိုင်-ပကဖ၊ နွားထိုးကြီး မြို့နယ်-ပကဖ၊ မလှိုင်မြို့နယ်-ပကဖ/ TTA ပြောက်ကျားတပ်ဖွဲ့တို့ ပူးပေါင်းတိုက်ခိုက်ခဲ့တာလို့ဆိုပါတယ်။
နွားထိုးကြီးမြို့နယ်၊ အိုးပုံတောရွာကို အာဏာသိမ်းစစ်တပ်မှ ဇူလိုင်လ၂ ရက်၊ ညနေ ၅ နာရီအချိန်ခန့်က ညောင်ဦးလေတပ်မှတက်လာတဲ့ ဂျိုင်ရိုကော်ပတာနှစ်စီးနဲ့ ဗုံးသီးလေးလုံးကြဲချတိုက်ခိုက်ခဲ့လို့ အရပ်သားတွေသေဆုံးဒဏ်ရာရသွားတယ်လို့ဆိုပါတယ်။
တောင်သာမြို့နယ်၊ လှည်းကူးမရွာကိုလည်း ဇူလိုင်လ၂ရက်၊ ည၁၀နာရီအချိန်မှာ နေပြည်တော်လေတပ်မှတက်လာတဲ့ ဂျက်ဖိုင်တာတစီးနဲ့လေကြောင်းတိုက်ခိုက်မှုပြုလုပ်ခဲ့တယ်လို့ ပြည်သူ့ကာကွယ်ရေးတပ်မတော် -PDFက အသိပေးထားပါတယ်။
