Border News Agency
ချင်းမိုင်၊ ဇူလိုင် ၂ဝ။
ထိုင်းနိုင်ငံသားတွေကို အမည်ခံအစုရှယ်ယာရှင်တွေအဖြစ်သုံးပြီး မြေကွက်တွေကို တရားမဝင် ပိုင်ဆိုင်ထားတဲ့ ကွန်ရက်တခုကို ထိုင်းရဲတပ်ဖွဲ့ကဖော်ထုတ်လိုက်ပြီး မြန်မာ ခုနှစ်ဦး အပါအဝင် နိုင်ငံခြားသားနဲ့ ထိုင်းနိုင်ငံသား စုစုပေါင်း နှစ်ဆယ့်နှစ် ဦးကို ဖမ်းဝရမ်း ထုတ်ထားပါတယ်။
ဝရမ်းထုတ်ခံရသူတွေထဲက သံသယရှိသူ ငါး ဦးကို ဖမ်းဆီးရမိထားပြီး အဲဒီထဲမှာ မြန်မာနိုင်ငံသား သုံး ဦးနဲ့ အိန္ဒိယနိုင်ငံသား နှစ် ဦး ပါဝင်တယ်လို့ ထိုင်းသတင်းတွေမှာ ဖော်ပြထားပါတယ်။
ရဲတပ်ဖွဲ့ဟာ အင်အား နှစ်ရာငါးဆယ် ကျော်နဲ့ ချင်းမိုင်ခရိုင်အတွင်းက နေရာ တဆယ့်ရှစ် ခုကို ဝင်ရောက်ရှာဖွေခဲ့ရာ ကုမ္ပဏီ သုံးဆယ့်တစ် ခုနဲ့ မြေကွက် နှစ်ဆယ့်ကိုး ကွက်အပါအဝင် ဘတ် ခြောက်ရာသုံးဆယ့်သုံး သန်းခန့် တန်ဖိုးရှိတဲ့ တရားမဝင် ပိုင်ဆိုင်မှုတွေကို ဖော်ထုတ်နိုင်ခဲ့တာပါ။
အဲဒီစစ်ဆင်ရေးဟာ ခရီးသွားလုပ်ငန်း အားကောင်းတဲ့ ခရိုင်တွေမှာ နိုင်ငံခြားသားတွေက ထိုင်းနိုင်ငံသားတွေကို အမည်ခံအဖြစ် သုံးပြီး တရားမဝင် စီးပွားရေးနဲ့ မြေကွက် ပိုင်ဆိုင်နေတာတွေကို နှိမ်နင်းတဲ့ စစ်ဆင်ရေး တခုလည်း ဖြစ်ပါတယ်။
