Border News Agency
ထိုင်း၊ သြဂုတ် ၃။
ထိုင်းနိုင်ငံ၊ တာ့ခ်ခရိုင်ထဲကို တရားမဝင်လာတဲ့ကလေးငယ်တွေအပါအဝင် မြန်မာနိုင်ငံသားလေးဆယ့်ရှစ်ဦးကိုဖမ်းမိခဲ့တယ်လို့ ထိုင်းနယ်စပ်အထူးတပ်ဖွဲ့တွေက သြဂုတ်လ ၃ ရက်၊ ဒီနေ့ထုတ်ပြန်ပါတယ်။
အဲဒီတာ့ခ်ခရိုင်၊ မဲဆောက်မြို့နယ်၊ မယ်တောင်ကျေးရွာအုပ်စု၊ ဒွန်ချိုင်ကျေးရွာကိုရောက်ရှိလာတဲ့ ကလေးငယ်နှစ်ဦးအပါအဝင် မြန်မာလုပ်သားသုံးဆယ့်သုံးဦးကို ရာချာမနူးအထူးတပ်ဖွဲ့ဝင်တွေက ဇူလိုင်လ ၃၁ ရက်၊ ညပိုင်းကစစ်ဆေးတွေ့ရှိခဲ့တာပါ။
အဲဒီမြန်မာလုပ်သားသုံးဆယ့်သုံးဦးဟာ ထိုင်းနိုင်ငံဘက်ကို နယ်စပ်ကနေတဆင့် တရားမဝင်ဝင်ရောက်လာတာဖြစ်တယ်လို့ ဝန်ခံခဲ့ကြတာကြောင့် ဥပဒေအတိုင်းအရေးယူနိုင်ဖို့ မဲဆောက်မြို့နယ် ရဲစခန်းကိုလွှဲပြောင်းထားပါတယ်။
အဲဒီအပြင် အဲဒီနေ့ညပိုင်းမှာပဲ တာ့ခ်ခရိုင်၊ ဝမ်ကျောက်မြို့နယ်ထဲမှာ လမ်းပြတဦးနဲ့အတူတရားမဝင်လာတဲ့ မြန်မာနိုင်ငံသားတဆယ့်ငါးဦးကို နရစွန်တပ်ဖွဲ့က ထပ်မံဖမ်းဆီးရမိခဲ့ပါတယ်။
သူတို့တဆယ့်ငါးဦးဟာ သွားချင်တဲ့နေရာကိုပို့ပေးဖို့ လမ်းပြဖြစ်သူကို တဦးကိုဘတ်ငါးရာနှုန်းနဲ့ ငှားခဲ့တာလို့ထွက်ဆိုခဲ့ကြပြီး အားလုံးကိုဝမ်ကျောက်မြို့နယ် ရဲစခန်းဆီ အရေးယူဖို့အပ်နှံထားပါတယ်။
