Border News Agency
မလေးရှား၊ဩဂုတ် ၁၇။
မလေးရှားနိုင်ငံ၊ ဂျိုဟိုးပြည်နယ်၊ စက်ရုံတွေမှာ တရားမဝင်လာရောက်လုပ်ကိုင်နေတဲ့ မြန်မာနိုင်ငံသား ၉၃ ဦး အပါအဝင် နိုင်ငံခြားသား ၁၂၇ ဦးကို မလေးရှား အာဏာပိုင်တွေကဖမ်းဆီးလိုက်တယ်လို့ ဂျိုဟိုးပြည်နယ် လူဝင်မှုကြီးကြပ်ရေးဌာနက ဩဂုတ်လ ၁၆ ရက်နေ့မှာထုတ်ပြန်ပါတယ်။
နှစ်လခန့်စုံစမ်းမှုတွေပြုလုပ်ပြီးနောက် ဩဂုတ်လ ၁၁ ရက်၊ညပိုင်းမှာ ဂျိုဟိုးဘာရူးမြို့အနီးရှိ လုပ်ငန်းခွင် ၃ ခုကိုဝင်ရောက်စစ်ဆေးရာမှ ဖမ်းဆီးရမိခဲ့တာဖြစ်ပါတယ်။
အဲဒီစစ်ဆေးမှုအတွင်း တရားမဝင်အလုပ်သမားတွေကိုချိတ်ဆက်ပေးတဲ့ ဘင်္ဂလားဒေ့ရှ် ပွဲစား ၂ ဦး၊ ကြီးကြပ်သူဘင်္ဂလားဒေ့ရှ် ၁ ဦးနဲ့ မြန်မာ ၁ ဦးတို့ကိုပါ ဖမ်းဆီးမိခဲ့ပါတယ်။
ဖမ်းဆီးခံရသူတွေမှာ အသက် ၂၀ မှ ၄၉ နှစ်အတွင်းရှိ မြန်မာ ၉၃ ဦး၊ဘင်္ဂလားဒေ့ရှ် ၁၁ ဦး၊ အင်ဒိုနီးရှား ၁၀ ဦး၊ အိန္ဒိယ ၉ ဦး၊ သီရိလင်္ကာ ၂ ဦးနှင့် ပါကစ္စတန် ၁ ဦးတို့ပါဝင်ပြီး ပွဲစားဆီမှလစာထုတ်ဖို့စောင့်ဆိုင်းနေချိန်မှ ဖမ်းဆီးခံရတာဖြစ်ပါတယ်။
အဲဒီဖမ်းဆီးခံရသူတွေကို လူဝင်မှုကြီးကြပ်ရေးစခန်းသို့ပို့ဆောင်ထားပြီး ဥပဒေမဲ့လုပ်ကိုင်နေတဲ့ပွဲစားတွေနဲ့အလုပ်ရှင်တွေကိုလည်း ထိရောက်စွာအရေးယူဆောင်ရွက်သွားမယ်လို့ဆိုပါတယ်။
