Border News Agency
ငဖဲ၊ ဩဂုတ် ၁၇။
မကွေးတိုင်း၊ငဖဲမြို့မှာ အာဏာသိမ်းစစ်တပ်ခိုခြုံတိုက်ခိုက်ခဲ့လို့ တပ်ဦးချုပ်အပါအဝင်တပ်ဖွဲ့ဝင်သုံးဦးသေဆုံးသွားတယ်လို့ ချင်းကာကွယ်ရေးတပ်ဖွဲ့ – အရှိုမှ ဩဂုတ်လ ၁၇ ရက်နေ့ထုတ်ပြန်ပါတယ်။
အဲဒီငဖဲမြို့အနီးမှာ ဩဂုတ်လ ၁၄ ရက်နေ့က ရိက္ခာသွားရောက်သယ်ယူနေချိန် CDF – Ashoတပ်ဦးချုပ်ဆလိုင်းရိုးချင်းဦးဆောင်တဲ့ ချင်းကာကွယ်ရေးတပ်ဖွဲ့ – အရှိုစစ်ကြောင်းကို စစ်တပ်မှခြုံခိုတိုက်ခိုက်ခဲ့တာလို့ဆိုပါတယ်။
အဲဒီလိုခြုံခိုတိုက်ခိုက်ခဲ့တာကြောင့် တိုက်ပွဲအတွင်း တပ်ဦးချုပ် ဆလိုင်းရိုးချင်း(ကိုယ်ပိုင်အမှတ် CDF-452001)၊ ဒုတပ်ကြပ် ဆလိုင်းဖြိုးသီဟဇော် (ကိုယ်ပိုင်အမှတ် CDF-452053)နဲ့ တပ်ဖွဲ့ဝင် အောင်လင်းဇော် (ကိုယ်ပိုင်အမှတ် CDF-452121)တို့ နေရာမှာပင်သေဆုံးခဲ့တယ်လို့ ဆိုပါတယ်။
အဲဒီအပြင် တပ်ဖွဲ့ဝင်တဦးမှာလည်း အာဏာသိမ်းစစ်တပ်ရဲ့ဖမ်းဆီးတာကိုခံခဲ့ရပြီး ကျန်တပ်ဖွဲ့ဝင်သုံးဦးမှာ လွတ်မြောက်ခဲ့တယ်လို့ ဆိုပါတယ်။
နောက်ပြီး တပ်ဦးချုပ်ဆလိုင်းရိုးချင်းသေဆုံးခဲ့ရမှုဟာ CDF – Asho တပ်ဖွဲ့တခုတည်းအတွက်တင်မကဘဲ အရှိုချင်းလူမျိုးတရပ်လုံးအတွက်ပါ အစားထိုးမရနိုင်သလိုကြီးမားတဲ့ဆုံးရှုံးမှုတခုဖြစ်တယ်လို့ CDF – Asho က ဆိုပါတယ်။
