Border News Agency
တာ့ခ်၊ဩဂုတ် ၁၇။
ထိုင်းနိုင်ငံ၊တာ့ခ်ခရိုင်၊မယ်ရမတ်မြို့နယ်မှာ ဆိုင်ကယ်တွေနဲ့တရားမဝင်ဝင်ရောက်လာတဲ့ မြန်မာနိုင်ငံသားငါးဦးကိုဖမ်းဆီးခဲ့တယ်လို့ နရစွန်တပ်ဖွဲ့က သြဂုတ်လ ၁၇ ရက်၊ဒီနေ့ထုတ်ပြန်ပါတယ်။
နရစွန်တပ်ဖွဲ့က မယ်ရမတ်မြို့နယ်အတွင်း ကင်းလှည့်စစ်ဆေးချိန် ထိုင်းနိုင်ငံသားလမ်းပြနှစ်ဦးမောင်းနှင်တဲ့ မော်တော်ဆိုင်ကယ်သုံးစီးနဲ့လိုက်ပါလာတဲ့ မြန်မာ ငါးဦးကိုစစ်ဆေးရာမှာ အထောက်အထားမပြနိုင်လို့ ဖမ်းဆီးခဲ့တာဖြစ်ပါတယ်။
ဆိုင်ကယ်မောင်းနှင်သူတွေကလည်း မြန်မာနိုင်ငံသားတွေကို တဦးကိုဘတ်တထောင်နှုန်းနဲ့ တင်ဆောင်လာတာဖြစ်တယ်လို့ဝန်ခံထားပြီး ဖမ်းဆီးရမိသူအားလုံးကို ဥပဒေအရအရေးယူဖို့ မယ်ရမတ်ရဲစခန်းကို လွှဲပြောင်းပေးလိုက်ပါတယ်။
ပြီးခဲ့တဲ့ ဩဂုတ်လ ၇ ရက်နဲ့၁၃ ရက်နေ့တွေကလည်း ကန်ချနဘူရီခရိုင်အတွင်း တရားမဝင်ဝင်ရောက်လာတဲ့ မြန်မာလုပ်သားတရာကျော်ကို ထိုင်းခရိုင်ရဲတပ်ဖွဲ့ကဖမ်းဆီးခဲ့ပါသေးတယ်။
