Border News Agency
မောင်တော၊ ဩဂုတ် ၂၀ ။
အာရက္ခတပ်တော် (AA)ထိန်းချုပ်ထားတဲ့ မောင်တောမြို့နယ်၊အင်းဒင်ကျေးရွာမှာ ဩဂုတ် ၂၀ ရက်၊ဒီနေ့မနက် ၁၁ နာရီ ၂၀ မိနစ်အချိန်ခန့်က စစ်ကျန်ဗုံးသီးပေါက်ကွဲလို့ ကလေးဆယ်ဦးဒဏ်ရာရသွားပါတယ်။
အဲဒီအင်းဒင်ကျေးရွာမှ အသက်ငါးနှစ်မှ နှစ်ဆယ်နှစ်ဝန်းကျင်အရွယ်မောင်မင်းမြတ်သာကီ၊ မမိုးရွှေပန်း၊ မစိန်ရတီဦး၊ မမိုးနွယ်ဦး၊ မောင်မိုးအောင်ဌေးနဲ့ ပဲရုံကျေးရွာမှ မောင်ခိုင်သူရိန်ထွန်း၊ မောင်ပြည့်ဆန်းကျော်စွာ၊ မောင်အောင်ဟိန်းထက်၊ မောင်အောင်ငြိမ်းထက်၊ မောင်မြတ်လင်းအောင်တို့ဒဏ်ရာရသွားခဲ့တာပါ။
သူတို့တွေဟာ ရွာကကစားနေကျခြံဝင်းမှာကစားနေကြချိန် စစ်ကျန်ဗုံးသီးတလုံးကိုထုခွဲဆော့ကစားရာမှပေါက်ကွဲသွားတာကြောင့် ဒဏ်ရာရသွားကြတာဖြစ်ပြီး ကလေးငယ်ခြောက်ဦးမှာ ဒဏ်ရာပြင်းထန်ကာ အရေးပေါ်ဆေးကုသမှုခံယူနေရပြီး ငွေကြေးအကူအညီလိုအပ်နေပါတယ်။
အာရက္ခတပ်တော်ဟာ သူတို့ထိန်းချုပ်မြို့နယ်တွေမှာ မိုင်းရှင်းလင်းရေးတွေလုပ်ဆောင်နေပေမယ့် အရပ်သားပြည်သူတွေကတော့ မြေမြုပ်မိုင်းအန္တရာယ်တွေ၊ စစ်ကျန်လက်နက်အန္တရာယ်တွေကိုလည်း မကြာခဏကြုံတွေ့နေကြရသလို သေဆုံးဒဏ်ရာရထိခိုက်တာတွေ မကြာခဏဖြစ်နေကြတယ်လို့ အာရက္ခပြည်သူတွေက ဆိုကြပါတယ်။
အာရက္ခပြည်သူ့တော်လှန်ရေးအစိုးရဟာ မိုင်းအသိပညာပေးမှုတွေ၊မြေမြုပ်မိုင်းအန္တရာယ်ဟောပြောပွဲတွေကို ပြည်သူလူထုတွေကြားမှာလုပ်ဆောင်နေပြီး မိုင်းအသိပညာဝေတာတွေ၊မိုင်းအန္တရာယ်ဆိုင်ရာ သတိပေးတာတွေကို ပုံမှန်လုပ်ဆောင်နေပါတယ်။
ဒါပေမယ့်အာရက္ခပြည်သူတွေဟာ စစ်ကော်မရှင်တပ်ရဲ့ မိုင်းတွေ၊စစ်ကျန်လက်နက်အန္တရာယ်တွေကို မကြာခဏကြုံတွေ့နေကြရတာမို့ မိုင်းရှင်းလင်းပေးတာတွေ၊မိုင်အသိပညာပေးတာတွေကို ပိုမိုဆောင်ရွက်ပေးဖို့ လိုအပ်နေသေးတယ်လို့ အာရက္ခပြည်သူတွေကဆိုကြပါတယ်။
