Border News Agency
ဘန်ကောက်၊ ဩဂုတ် ၂၅။
ထိုင်းနိုင်ငံမှာ ရောက်မြန်မာနိုင်ငံသားတွေအနေနဲ့ လုံခြုံရေးအထူးဂရုပြုသွားလာနေထိုင်ကြဖို့ ဘန်ကောက်မြို့ရှိ မြန်မာသံရုံးက ဩဂုတ်လ ၂၄ ရက်နေ့က အသိပေးထုတ်ပြန်ထားပါတယ်။
ထိုင်းနိုင်ငံတောင်ပိုင်းရှိ ပတ္တနီ၊ ယာလာနဲ့ နရာသီဝပ်ပြည်နယ်တွေမှာ အကြမ်းဖက်တိုက်ခိုက်မှုတွေဆက်တိုက်ဖြစ်ပေါ်နေတာကြောင့် အဲဒီဒေသတွေမှာရောက်နေတဲ့ မြန်မာတွေအနေနဲ့ မသက်ဆိုင်တဲ့လူစုလူဝေးတွေမှာ ပါဝင်တာမလုပ်ဖို့နဲ့သတိထားနေထိုင်ကြဖို့ နှိုးဆော်ထားတာပါ။
အကြောင်းတစုံတရာပေါ်ပေါက်လာရင် မြန်မာသံရုံးနဲ့ အလုပ်သမားသံအရာရှိရုံးဆီချက်ချင်း ဆက်သွယ်အကြောင်းကြားနိုင်တယ်လို့လည်း အသိပေးထားပါတယ်။
ထိုင်းတောင်ပိုင်းပြည်နယ်သုံးခုနဲ့ ဆုန်းခလာ ပြည်နယ်မှာ သြဂုတ်လ ၂၂ ရက်နဲ့ ၂၃ ရက်နေ့ကနေရာပေါင်းခုနှစ်ဆယ်ထက်မနည်းမှာ ဗုံးခွဲမှု၊မီးရှို့မှုနဲ့ စက်ရုံ၊အစိုးရရုံးတွေတိုက်ခိုက်ခံရမှုတွေပြိုင်တူဖြစ်ပွားခဲ့ပြီး အနည်းဆုံး လူသုံးဦးဒဏ်ရာရရှိခဲ့ပါတယ်။
အဲဒီဖြစ်စဉ်တွေကြောင့် နရာသီဝပ်ပြည်နယ်အပါအဝင် အချို့ဒေသတွေမှာ ညမထွက်ရအမိန့်ထုတ်ပြန်ထားရပြီး တပ်မတော်နဲ့ လုံခြုံရေးတပ်ဖွဲ့တွေကရထားလမ်းတွေ၊ဆက်သွယ်ရေးတာဝါတိုင်တွေနဲ့ လမ်းဆုံလမ်းခွတွေမှာ လုံခြုံရေးတိုးမြှင့်စစ်ဆေးနေပါတယ်။
