Border News Agency
ဘူးသီးတောင်၊စက်တင်ဘာ ၃။
အာရက္ခတပ်တော်(AA)ထိန်းချုပ်ထားတဲ့ ဘူးသီးတောင်မြို့နယ်၊ ကာဒီကျေးရွာအနီး ပြီးခဲ့တဲ့ဩဂုတ်လ ၃၀ ရက်၊ညပိုင်းက ရသေ့တောင်မှ ဘူးသီးတောင်သို့ ခရီးသည်ဆယ်ဦးနဲ့မောင်းနှင်လာတဲ့ စက်လှေတစီးလှိုင်းထန်ကာရေနစ်မြုပ်ခဲ့ပါတယ်။
အဲဒီစက်လှေပိုင်ရှင်မောင်းနှင်လာသူဟာ အရက်သေစာသောက်စားထားသူဖြစ်ပြီး နစ်မြုပ်မှုကြောင့် ညောင်ချောင်းကျေးရွာစာသင်ကျောင်းမှကျောင်းဆရာစိုးမိုးကျော်ရေနစ်ပျောက်ဆုံးနေဆဲဖြစ်ပါတယ်။
ဒေသခံတွေကစက်လှေတွေနဲ့ အမြန်ဆုံးသွားရောက်ကယ်ဆယ်ခဲ့တာကြောင့် လှေပိုင်ရှင်နဲ့ခရီးသည်ကိုးဦးဘေးကင်းစွာ လွတ်မြောက်ခဲ့ကြပါတယ်။
အဲဒီကယ်ဆယ်ရေးမှာပါဝင်ခဲ့တဲ့ ဘုရားပြင်နဲ့အောင်ပကျေးရွာမှ ဒေသခံခြောက်ဦးကို အာရက္ခပြည်သူ့တော်လှန်ရေးအစိုးရက တဦးကိုကျပ်နှစ်သိန်းစီနဲ့ စုစုပေါင်းကျပ်ဆယ့်နှစ်သိန်းဂုဏ်ပြုချီးမြှင့်ခဲ့ပါတယ်။
အဲဒီဖြစ်စဉ်နဲ့ပတ်သက်ပြီး အရက်သေစာသောက်စားကာ မောင်းနှင်ခဲ့တဲ့စက်လှေပိုင်ရှင်ကို တရားဥပဒေစိုးမိုးရေးနဲ့ ပြည်သူ့လုံခြုံရေးဌာန (DELEPS) က လုပ်ထုံးလုပ်နည်းနဲ့အညီ အရေးယူဆောင်ရွက်နေပါတယ်။
