​Border News Agency
ပုဏ္ဏားကျွန်း၊စက်တင်ဘာ ၂၈။

​အာရက္ခတပ်တော် (AA)ထိန်းချုပ်မြို့နယ်တွေကို အာဏာသိမ်းစစ်တပ်က စက်တင်ဘာလလ ၁ ရက်နေ့မှဒီနေ့ထိ နေ့စဥ်လေကြောင်းတိုက်ခိုက်နေတယ်လို့ အာရက္ခပြည်သူတွေက ဆိုကြပါတယ်။

အဲ​ဒီရသေ့တောင်၊ပုဏ္ဏားကျွန်း၊ကျောက်တော်၊မြောက်ဦး၊မင်းပြား၊ပေါက်တော၊အမ်း၊ဂွ၊သံတွဲ စတဲ့မြို့နယ်တွေကို လေကြောင်းတိုက်ခိုက်နေတာပါ။

အဲဒီလိုလေကြောင်းတိုက်ခိုက်နေတာကြောင့် ပြည်သူခြောက်ဦးသေဆုံးခဲ့ပြီး ဆယ့်ငါးဦးဒဏ်ရာရသွားခဲ့တယ်လို့ စက်တင်ဘာလ ၂၇ ရက်၊မနေ့က အာရက္ခတပ်တော်ထုတ်ပြန်ပါတယ်။

အဲဒီလိုလေကြောင်းတိုက်ခိုက်မှုတွေကို နေ့စဥ်လိုလိုပြုလုပ်နေတာမို့ ဒေသခံပြည်သူတွေ စိုးရိမ်နေကြရတယ်လို့ ဆိုကြပါတယ်။

​”စစ်တပ်က ခုရက်ပိုင်းပိုပြီးလေကြောင်းကင်းထောက်တယ်။ ပြီးရင် အုပ်စုလိုက်လာတယ်။ ကြဲတယ်။ ညဉ့်နက်သန်း ခေါင်ကြီးတွေမှာပိုကြီးအဲလိုလုပ်တယ်။ကျမတို့ ပြည်သူတွေက ဘယ်အချိန်ဗုံးကျမလဲဆိုတာမသိရတော့ ညဆိုလည်းအိပ်လို့မရကြဘူး။”လို့ ပုဏ္ဏားကျွန်းမြို့ နယ်မှ အာရက္ခပြည်သူတဦးက Border News Agency ကို ပြောပါတယ်။

​အဲဒီအာရက္ခတပ်တော်ထိန်းချုပ်မြို့နယ်တွေကို အာဏာသိမ်းစစ်တပ်ကလေကြောင်းတိုက်ခိုက်နေသလို လက်နက်ကြီးတွေ၊အသေခံဒရုန်းတွေနဲ့လည်း ပစ်ခတ်တိုက်ခိုက်နေပါတယ်။

​အဲဒီလိုပစ်ခတ်တိုက်ခိုက်မှုတွေကြောင့် လူနေအိမ်တွေအပါအဝင် စာသင်ကျောင်းတွေ၊ဆေးရုံ၊ဘုန်းကြီးကျောင်းတွေနဲ့ သမိုင်းဝင်ဘုရားပုထိုးတွေလည်းပျက် စီးခဲ့ပါတယ်။

အဲဒီအထဲမှာ ပင်လယ်ကမ်းစပ်အနီးနေရာတွေဟာ ကြည်း၊ရေ၊လေ ပူးပေါင်းပစ်ခတ်တာတွေကို ပိုခံနေကြရတယ်လို့ဒေသခံတွေက ဆိုကြပါတယ်။

​”ကျိန္တလီကိုသူတို့ ဒီရက်ပိုင်းအတွင်း လေကြောင်းကင်းထောက်ပြီးဗုံးကြဲတာ။ပြီးတော့ သံတွဲကိုဆိုရင်လည်း လေကြောင်းရယ်နေဗီတွေကရယ်ပစ်တာ။ ညဖက်တွေဆို အိပ်လို့တောင်မရဘူး။အမြဲသတိနဲ့နေရတယ်။”လို့ စစ်ရေးသတင်းရင်းမြစ်တဦးက Border News Agency ကိုပြောပါတယ်။

​စစ်တပ်ရဲ့ လေကြောင်းတိုက်ခိုက်မှုအန္တရာယ်ကြောင့် ဒေသခံပြည်သူတွေမှာ စိုးရိမ်ထိတ်လန့်နေရပြီး ပုံမှန်လူနေမှုဘဝတွေရပ်တန့်ကာ ဘေးလွတ်ရာသို့ တိမ်းရှောင်နေကြရတယ်လို့ အာရက္ခပြည်သူတွေက ဆိုကြပါတယ်။

​အာဏာသိမ်းစစ်တပ်ဟာ စစ်ရေးအရှုံးကြောင့် အရပ်သားတွေကို ရွယ်ရည်ချက်ရှိရှိ ပစ်မှတ်ထားတိုက်ခိုက်နေတာကြောင့် ပြည်သူတွေအနေနဲ့လေကြောင်းအန္တရာယ်အထူးသတိပြုကြဖို့ အာရက္ခတပ်တော်ကသတိပေးနှိုးဆော်ထားပါတယ်။