Border News Agency
မောင်တော၊ နိုဝင်ဘာ ၂၁။
ရိုဟင်ဂျာလူမျိုးတုန်းသတ်ဖြတ်ခံရမှုအတွက်အပြည်ပြည်ဆိုင်ရာတရားရုံး (ICJ)ရဲ့စီရင်ချက်ထွက်လာပြီး နောက်ဘင်္ဂလားဒေ့ရှ်ရောက် နေရပ်စွန့်ခွာသူတွေကို ပြန်လည်လက်ခံရေးလုပ်ငန်းစဉ်တွေမှာ စနစ်တကျစိစစ်ဖို့နဲ့ အာရက္ခပြည်သူတွေရဲ့လုံခြုံရေးကို အာမခံချက်ပေးဖို့ အာရက္ခအရပ်ဘက်အဖွဲ့အစည်းတွေက လိုလားနေကြပါတယ်။
အာရက္ခဒေသမှာ အာရက္ခပြည်သူတွေ ကိုယ်တိုင်တောင်စစ်ဘေးဒဏ်ကြောင့် အိုးအိမ်စွန့်ခွာထွက်ပြေးနေရဆဲဖြစ်တာကြောင့် အစီအစဉ်တကျပြင်ဆင်မှုမရှိဘဲနဲ့ ဒေသတည်ငြိမ်မှု မရသေးခင်ချက် ချင်းပြန်လည်လက်ခံဖို့က လက်တွေ့မကျသလို ဒေသခံတွေအတွက်လည်း ဝန်ထုပ်ဝန်ပိုး ဖြစ်စေနိုင်တယ်လို့ ထောက်ပြကြပါတယ်။
“မူအရလူသားချင်းစာနာထောက်ထားမှု ရှုထောင့်ကနေ လက်ခံသင့်တယ်ဆိုပေမဲ့ စနစ်တကျ စိစစ်လက်ခံမှုနဲ့ ရခိုင်လူမျိုးတွေရဲ့ စိုးရိမ်ပူပန်မှုတွေကို အာမခံချက်ပေးနိုင်တဲ့ စနစ်မျိုး မရှိဘဲနဲ့တော့ သဘောတူဖို့ မလွယ်ပါဘူး။နှစ်ဖက်လူမှုအသိုက်အဝန်းကြား ယုံကြည်မှုတည်ဆောက်ပြီးမှသာ ရေရှည်တည်တံ့တဲ့ ဖြေရှင်းမှု ဖြစ်နိုင်ပါလိမ့်မယ်။” လို့ အမည်မဖော်လိုတဲ့ အရပ်ဘက်လူမှုအဖွဲ့အစည်းတက်ကြွလှုပ်ရှားသူ အမျိုးသမီးတဦးက Border News Agency ကိုပြောပါတယ်။
အဲဒီအပြင် ပြန်လည်လက်ခံရေး လုပ်ငန်းစဉ်ဟာ နိုင်ငံရေးအရ အမြတ်ထုတ်တဲ့ လုပ်ငန်းစဉ် မဖြစ်သင့်သလို မြေပြင်မှာ အမှန်တကယ်နေထိုင်ခဲ့သူ ဟုတ်၊မဟုတ် သေချာစိစစ်နိုင်မယ့်ပွင့်လင်းမြင်သာမှုရှိတဲ့စနစ်တခု ရှိရမယ်လို့ ဒေသခံတွေကဆိုကြပါတယ်။
“ဒေသတွင်းအချုပ်အခြာအာဏာနဲ့ နယ်မြေလုံခြုံရေးမထိခိုက်စေဖို့က ပထမဦးစားပေး ဖြစ်ရပါမယ်။ တရားမဝင် ဝင်ရောက်လာမှုတွေကို တိကျတဲ့ နိုင်ငံသားစိစစ်ရေးစနစ်နဲ့ မစိစစ်ဘဲ၊ရခိုင်ပြည်သူတွေရဲ့ သဘောထားဆန္ဒကို မရယူဘဲ အတင်းအကျပ် ပြန်လည်လက်ခံခိုင်းတာကိုတော့ သဘောမတူနိုင်ပါဘူး။” လို့ အာရက္ခဒေသမှရပ်မိရပ်ဖတဦးဖြစ်သူဦးကျော်ဇံက Border News Agency ကိုပြောပါတယ်။
အဲဒီလိုပြန်လည်လက်ခံရေးနဲ့ရေရှည်ငြိမ်းချမ်းစွာအတူယှဉ်တွဲနေထိုင်ရေး ကိစ္စရပ်တွေအတွက် ဒေသခံတွေရဲ့ မြေယာပိုင်ဆိုင်ခွင့်နဲ့ လုံခြုံရေးဆိုင်ရာ အာမခံချက်တွေ အပါအဝင် အားလုံးပါဝင်တဲ့ ဥပဒေမူဘောင်တွေ ပေါ်ပေါက်လာဖို့ အရေးတကြီးလိုအပ်နေတယ်လို့ အရပ်ဘက်အဖွဲ့အစည်းတွေက သုံးသပ်ကြပါတယ်။
အဲဒီရိုဟင်ဂျာလူမျိုးတုန်းသတ်ဖြတ်မှုတွေဖြစ်ခဲ့တဲ့မောင်တော၊ဘူးသီးတောင်၊ရသေ့တောင်စတဲ့မြို့နယ်တွေအပါအဝင် မြို့နယ်အများစုကိုအာရက္ခတပ်တော်ထိန်းချုပ်ထားပါတယ်။






