​Border News Agency

မြောက်ဦး၊ အောက်တိုဘာ ၂၂။

​လာမယ့်ဆောင်းရာသီနဲ့နွေရာသီမှာအယ်လ်နီညိုဖြစ်စဉ်ကြောင့် မိုးခေါင်ရေရှားမှုတွေ ကြုံတွေ့ရနိုင်ပြီး အပူချိန်မြင့်မားတာ၊ရေရှားပါးတာနဲ့ ဝမ်းပျက်ဝမ်း လျှောရောဂါတွေ ဖြစ်နိုင်တာမို့ပြည်သူတွေဟာ လက်တွေ့လိုက်နာဆောင်ရွက်နိုင်မယ့် နည်းလမ်းတွေကို ဖော်ပြပေးလိုက်ပါတယ်။

၁။​မိုးမကုန်မီ ရေစုဆောင်းပါ

မိုးရာသီမကုန်ဆုံးမီ အိမ်တိုင်းနဲ့ရပ်ရွာရှိ ကန်တွေ၊ ရေတွင်းတွေနဲ့ မိုးရေခံစနစ်တွေကို ပြင်ဆင်ပြီး မိုးရေကို ရနိုင်သမျှ စနစ်တကျစုဆောင်းထားကြဖို့လိုပါတယ်။

မိုးရေခံယူမယ့်အမိုးအကာတွေနဲ့ ရေတိုင်ကီတွေကိုလည်းကြိုတင်သန့်ရှင်းအောင် ပြုလုပ်ထားရပါမယ်။

၂။​သောက်သုံးရေစနစ်တကျ သန့်စင်ပါ

ရေရှားပါးချိန်မှာရေထဲမှာ အနည်အနှစ်နဲ့ ပိုးမွှားတွေ ပါဝင်နိုင်တာကြောင့် သောက်သုံးရေကို ကျိုချက်သောက်သုံးတာ သို့မဟုတ် နေရောင်ခြည်သုံး ရေသန့်စင်နည်းလို ရေသန့်ဘူးတွေထဲရေထည့်ပြီး သုံး နာရီမှ ခြောက် နာရီထိ နေပူလှန်းသန့်စင်တဲ့ နည်းလမ်းတွေကို အသုံးပြုနိုင်ပါတယ်။

၃။​ရေကိုစနစ်တကျ ဦးစားပေး ခွဲဝေသုံးစွဲပါ

တအိမ်ထောင်ချင်းစီအလိုက် ရေသုံးစွဲမှုကိုချွေတာပြီး ရေရှားပါးလာရင် လူသောက်သုံးရေးကိုပထမဦးစားပေးရပါမယ်။

အိမ်သုံးရေးကိုဒုတိယ၊ စိုက်ပျိုးရေးနဲ့ မွေးမြူရေးအတွက် ရေကို အစဉ်လိုက်ဦးစားပေး ခွဲဝေသုံးစွဲကြရပါမယ်။

၄။​ကျန်းမာရေးနဲ့ရောဂါဘယကာကွယ်ပါ

ရေရှားပါးချိန်မှာဖြစ်တတ်တဲ့ သွေးလွန်တုပ်ကွေးနဲ့တခြား ကူးစက်ရောဂါတွေ မပြန့်ပွားစေဖို့ ရေသိုလှောင်တဲ့ အိုးခွက်တွေကို လုံအောင် ဖုံးအုပ်ထားပါ။

ခြင်မပေါက်ဖွားနိုင်အောင် အပတ်စဉ် ရေလဲလှယ် ဆေးကြောပေးဖို့ လိုအပ်ပါတယ်။

၅။​ရပ်ရွာ ရေကော်မတီတွေနဲ့ပူးပေါင်းဆောင်ရွက်ပါ။

ရပ်ရွာအတွင်းရေအဆင့် အခြေအနေကို ပုံမှန်စောင့်ကြည့်ပြီး အရေးပေါ် ရေပြတ်လပ်မှုတွေ ကြုံတွေ့ရရင်ရပ်ရွာရေကော်မတီတွေ၊အုပ်ချုပ်ရေးအဖွဲ့တွေနဲ့ ပူးပေါင်းကာ စနစ်တကျ ဝိုင်းဝန်းဖြေရှင်းကြရပါမယ်။

​မိုးလေဝသနဲ့ဇလဗေဒညွှန်ကြားမှုဦးစီးဌာနမှ ထုတ်ပြန်တဲ့ သတိပေးချက်တွေကို အစဉ်မပြတ် စောင့်ကြည့်ပြီး သဘာဝဘေးအန္တရာယ်မှ ကြိုတင်ကာကွယ်နိုင်ဖို့ Border News Agency ကအသိပေးလိုက်ပါတယ်။