Border News Agency
ဘူးသီးတောင်၊ အောက်တိုဘာ ၂၀။
အာရက္ခတပ်တော်(AA)ထိန်းချုပ်ထားတဲ့ ဘူးသီးတောင်မြို့နယ်မှာ စစ်ကျန်လက်နက်ပေါက်ကွဲလို့ ကလေးနှစ်ဦးသေဆုံးသွားတယ်လို့ ရွာသားတွေက ဆိုကြပါတယ်။
အဲဒီဘူးသီးတောင်မြို့နယ်၊ နနွင်းတူးကျေးရွာက အသက်ဆယ့်ငါးနှစ်အရွယ် ဆော်တူလာနဲ့ကျောက်ဆိပ်ကျေးရွာက အသက်ဆယ့်လေးနှစ်အရွယ် မာမတ်ဖိုတ်ဆာရ်သေဆုံးသွားတယ်လို့ ရွာသားတွေက ဆိုကြပါတယ်။
သူတို့နှစ်ဦးဟာ အောက်တိုဘာလ ၁၉ ရက်နေ့က ဘူးသီးတောင်မြို့နယ်၊ ထန်းရှောက်ခံကျေးရွာရဲ အနောက်ဘက်မီတာငါးရာခန့်အကွာမှာ ကျွဲကျောင်းနေကြတာလို့ ဆိုကြပါတယ်။
အဲဒီကျွဲကျောင်းနေတဲ့အချိန် မြေပြင်ထဲထိုးစိုက်နေတဲ့ (RPG-7)လက်နက်ကြီးကျည်ကို ခြေထောက်နဲ့တိုက်မိရာက ပေါက်ကွဲပြီးသေဆုံးသွားခဲ့တယ်လို့ ရွာသားတွေက ဆိုကြပါတယ်။
“မတော်တဆခြေထောက်နဲ့ ထိမိတာထင်တယ်။ ဘူးသီးတောင်မြို့သိမ်းတိုက်ပွဲတုန်းက ကျန်နေခဲ့တဲ့ စစ်ကျန်လက်နက်ကြီးကျည်ဖြစ်မယ်။ အဲဒီနေရာမှာ မိုင်းတွေမရှင်းသေးလို့ ဖြစ်မယ်။”လို့ ရွာသားတဦးက Border News Agency ကို ပြောပါတယ်။
အဲဒီမောင်တောမြို့၊ လေးမိုင်ရပ်ကွက်မှာ အောက်တိုဘာလ ၁၈ ရက်နေ့ကလည်း အသက်နှစ်ဆယ်ငါးနှစ်အရွယ် ကိုဇော်လာဟာ မြို့အနီးရှိတောထဲသို့ သွားရာ မြေမြုပ်မိုင်းနင်းမိခဲ့လို့ ညာဘက်ခြေထောက်ခြေချင်းဝတ်နားကနေ ပြတ်ထွက်သွားခဲ့ပါတယ်။
အာရက္ခတပ်တော်ထိန်းချုပ်မြို့နယ်တွေမှာ မိုင်းရှင်းလင်းရေးတွေ လုပ်ဆောင်နေပေမယ့် အရပ်သားပြည်သူတွေကတော့ မြေမြုပ်မိုင်းအန္တရာယ်တွေ၊ စစ်ကျန်လက်နက်အန္တရာယ်တွေကိုလည်း မကြာခဏကြုံတွေ့နေကြရသလို သေဆုံးဒဏ်ရာရထိခိုက်တာတွေ မကြာခဏဖြစ်နေကြတယ်လို့ အာရက္ခပြည်သူတွေက ဆိုကြပါတယ်။
အာရက္ခပြည်သူ့တော်လှန်ရေးအစိုးရဟာ မိုင်းအသိပညာပေးမှုတွေ၊ မြေမြုပ်မိုင်းအန္တရာယ်ဟောပြောပွဲတွေကို ပြည်သူလူထုတွေကြားမှာ လုပ်ဆောင်နေပြီး မိုင်းအသိပညာဝေတာတွေ၊ မိုင်းအန္တရာယ်ဆိုင်ရာ သတိပေးတာတွေကို ပုံမှန်လုပ်ဆောင်နေပါတယ်။
ဒါပေမယ့် အာရက္ခပြည်သူတွေဟာ စစ်ကောင်စီတပ်ရဲ့ မိုင်းတွေ၊ စစ်ကျန်လက်နက်အန္တရာယ်တွေကို မကြာခဏကြုံတွေ့နေကြရတာမို့ မိုင်းရှင်းလင်းပေးတာတွေ၊ မိုင်အသိပညာပေးတာတွေကို ပိုမိုဆောင်ရွက်ပေးဖို့ လိုအပ်နေသေးတယ်လို့ အာရက္ခပြည်သူတွေက ဆိုကြပါတယ်။
