Border News Agency
နယ်သာလန်၊ ဇန်နဝါရီ ၂၂။
နယ်သာလန်နိုင်ငံ၊ သည်ဟိတ်ဂ်မြို့မှာရှိတဲ့ အပြည်ပြည်ဆိုင်ရာတရားရုံး (ICJ) ကိုသွားပြီး ဂမ်ဘီယာနိုင်ငံရဲ့ စွပ်စွဲချက်တွေကို ဥပဒေနဲ့အညီ သွားရောက်ရင်ဆိုင်နေတဲ့ မြန်မာကိုယ်စားလှယ်အဖွဲ့ကို မြန်မာနိုင်ငံဟာသပညာရှင်များအစည်းအရုံးက အပြည့်အဝထောက်ခံကြောင်း သဘောထားထုတ်ပြန်လိုက်ပါတယ်။
အဲဒီကိုယ်စားလှယ်အဖွဲ့ကို ပြည်ထောင်စုဝန်ကြီးဦးကိုကိုလှိုင်နဲ့ ဥပဒေရေးရာဝန်ကြီးချုပ် ဒေါက်တာသီတာဦးတို့က ဦးဆောင်တာဖြစ်ပြီး ဇန်နဝါရီလ ၁၂ ရက်ကနေ ၂၉ ရက်အထိ သွားရောက်တာဖြစ်ပါတယ်လို့ ဆိုပါတယ်။
အဲဒီလို သွားရောက်ဖြေရှင်းတာဟာ နိုင်ငံတကာဥပဒေတွေကို လေးစားလိုက်နာတဲ့ လုပ်ရပ်ဖြစ်သလို တာဝန်ယူမှုရှိတာကို ပြသနေတာဖြစ်တယ်လို့လည်း ဆိုပါတယ်။
အဲဒီအပြင် ဟာသပညာရှင်များအစည်းအရုံးအနေနဲ့ နိုင်ငံတော်နဲ့ပတ်သက်တဲ့ အငြင်းပွားမှုတွေကို တရားဥပဒေနဲ့အညီ ထိရောက်ပြတ်သားစွာ ဖြေရှင်းနေတာကို အပြည့်အဝထောက်ခံတယ်လို့ ဆိုပါတယ်။
ခုလိုမျိုး လုပ်ဆောင်တာဟာ ပကတိဖြစ်စဉ်အမှန်တွေကို ကမ္ဘာကသိရှိလာစေမှာဖြစ်ပြီး ယုံကြည်မှုတည်ဆောက်ရေးအတွက်လည်း အရေးကြီးတဲ့အခြေခံအချက်တခုလို့ ယုံကြည်တယ်လို့ဆိုပါတယ်။
အဲဒါကြောင့်လည်း နိုင်ငံတော်ကိုယ်စား ICJ ကိုသွားပြီး ကြိုးပမ်းဆောင်ရွက်နေတဲ့ ကိုယ်စားလှယ်အဖွဲ့ကို ဂုဏ်ပြုမှတ်တမ်းတင်ကြောင်းနဲ့ အစည်းအရုံးအနေနဲ့ နိုင်ငံတော်ရဲ့ မူဝါဒတွေအတိုင်း တသားတည်း ရပ်တည်သွားမယ်လို့လည်းဆိုပါတယ်။
