Border News Agency
အိုက်ဇောလ်၊ ဇန်နဝါရီ ၂၂။
အိန္ဒိယနိုင်ငံ၊ မီဇိုရမ်ပြည်နယ်၊ ရှာဟာခရိုင်မှာ ဇန်နဝါရီလ ၂၀ ရက်နေ့က မြန်မာကျပ်ငွေသိန်း ၃၄၀ ကျော်နဲ့အတူ မြန်မာသုံးဦးကို ဖမ်းဆီးခဲ့တယ်လို့ အာသံရိုင်ဖယ်က ထုတ်ပြန်ပါတယ်။
အဲဒီအသက်နှစ်ဆယ်တနှစ်အရွယ် ကိုကျော်ခိုင်၊ အသက်ငါးဆယ်အရွယ် ဒေါ်ဥမ္မာသင်း၊ အသက်ခြောက်ဆယ်သုံးနှစ်အရွယ် ဒေါ်ရွှေဝင်းကို ရှာဟာခရိုင်၊ လကီကျေးရွာ၊ ကားလမ်းပေါ်မှာ အာသံရိုင်ဖယ်တပ်က ဖမ်းဆီးခဲ့တာပါ။
သူတို့နဲ့အတူမီဇိုရမ်ဒေသခံ အသက်သုံးဆယ်လေးနှစ်အရွယ် သူမ်ဇာဆန်းနာ၊ အသက်သုံးဆယ်ခုနှစ်နှစ်အရွယ် လာလ်ရှက်ပွီးယာကိုလည်း ဖမ်းဆီးခဲ့တယ်လို့ ဆိုပါတယ်။
သူတို့ဆီက မြန်မာငွေကျပ် သိန်းသုံးရာ့လေးဆယ့်ခြောက်သိန်းခုနှစ်ထောင် ဖမ်းရတာမို့ ဥပဒေအရအရေးယူနိုင်ဖို့ သွီးပန်းရဲစခန်းကိုလွှဲပြောင်းပေးခဲ့တယ်လို့ ဆိုပါတယ်။
အဲဒီမီဇိုရမ်ပြည်နယ်ဟာ မြန်မာနိုင်ငံ၊ ချင်းပြည်နဲ့နယ်နိမိတ်ထိစပ်နေတာမို့ မြန်မာနိုင်ငံသားတွေဟာ မီဇိုရမ်ပြည်နယ်သို့ စျေးဝယ်၊ ဆေးကု၊ အလည်သွားလာနေကြတာမို့ မြန်မာကျပ်ငွေတွေကို ဖမ်းဆီးအရေးယူတာတွေမပြုလုပ်ကြဖို့ မြန်မာပြည်သားတွေ တောင်းဆိုနေကြပါတယ်။
အဲဒီမီဇိုရမ်ပြည်နယ်၊ ရှာဟာခရိုင်မှာ ဇန်နဝါရီလ ၁၆ ရက်နေ့ကလည်း မြန်မာကျပ်ငွေသိန်း ၁၄၀ ကျော်ကို အာသံရိုင်ဖယ်တပ်က ဖမ်းဆီးခဲ့သလို ဇန်နဝါရီလ ၂၁ ရက်နေ့ကလည်း မြန်မာကျပ်ငွေ သိန်း ၁၇၀ ကျော်ကို ဖမ်းဆီးခဲ့ပါတယ်။
မြန်မာစစ်တပ်အာဏာသိမ်းပြီးနောက် ချင်းလက်နက်ကိုင်တော်လှန်ရေးအဖွဲ့တွေ ထိန်းချုပ်နယ်မြေတွေအပါအဝင် အာရက္ခတပ်တော် (AA) ထိန်းချုပ်နယ်မြေတွေက ပြည်သူတွေဟာ မီဇိုရမ်ပြည်နယ်ကိုသာ အဓိကဆက်သွယ်သွား လာနေကြပါတယ်။
