Border News Agency
ရန်ကုန်၊ ဇန်နဝါရီ ၃၁ ။
အကြမ်းဖက်စစ်တပ်ကအာဏာသိမ်းခဲ့တာ ငါးနှစ်တာကြာလာပေမယ့် မြန်မာပြည်သူတွေဟာ စိတ်ဓာတ်ကြံ့ခိုင်စွာနဲ့ဆက်လက်ခုခံတော်လှန်နေဆဲဖြစ်တယ်လို့ Justice For Myanmar (JFM) ကဇန်နဝါရီလ ၃၁ ရက်၊ နေ့မှာ ထုတ်ပြန်ပါတယ်။
စစ်တပ်က အရပ်သားအစိုးရဆီကနေ အကြမ်းဖက်အာဏာသိမ်းခဲ့တာဟာ ဖေဖော်ဝါရီလ ၁ ရက်နေ့ဆိုရင် ငါးနှစ်ပြည့်မြောက်တဲ့နေ့ ဖြစ်ပါတယ်။
အဲဒီငါးနှစ်တာကာလအတွင်းမှာ စစ်အုပ်စုဟာနိုင်ငံအနှံ့အကြမ်းဖက်စစ်ဆင်ရေးတွေ၊ သတ်ဖြတ်မှုတွေနဲ့ ဖိနှိပ်မှုတွေကို လက်ရဲဇက်ရဲကျူးလွန်ခဲ့ပေမယ့် ပြည်သူ့တော်လှန်ရေးကတော့ ဖက်ဒရယ်ဒီမိုကရေစီ ပေါ်ပေါက်ရေးအတွက် ကြံ့ကြံ့ခံ ရှင်သန်အားကောင်းနေဆဲ ဖြစ်တယ်လို့ဆိုပါတယ်။
အကြမ်းဖက်စစ်တပ်ဟာတိုင်းပြည်အာဏာကို အလုံးစုံထိန်းချုပ်နိုင်ဖို့ငါးနှစ်လုံး ကြိုးပမ်းခဲ့ပေမယ့် မြန်မာပြည်သူတွေဆီကဖြစ်စေ၊နိုင်ငံတကာအသိုင်းအဝိုင်းဆီကဖြစ်စေ ဘယ်လိုလုပ်ပိုင်ခွင့်အာဏာနဲ့ တရားဝင်မှုကိုမှရရှိမနေဘူးဆိုတာ သိသာထင်ရှားနေတယ်လို့ JFM ကဆိုပါတယ်။
Justice For Myanmar ရဲ့ပြောရေးဆိုခွင့်ရှိသူ မရတနာမောင်က ငါးနှစ်တာကာလကြာမြင့်ခဲ့ပြီဖြစ်ပေမယ့် စစ်အုပ်စုဟာ အာဏာရှင်စနစ်ကို တော်လှန်လိုတဲ့ပြည်သူတွေရဲ့ဆန္ဒကို မရိုက်ချိုးနိုင်သေးဘူးလို့ဆိုပါတယ်။
သူတို့မှာ တရားဝင်မှုရောအုပ်ချုပ်ခွင့်ပါ မရှိတဲ့အတွက် ပြည်သူတွေအပေါ် အကြမ်းဖက်တဲ့နည်းလမ်းကိုပဲ အားကိုးနေရတာ ဖြစ်ပါတယ်” လို့ ပြောကြားခဲ့ပါတယ်။
အဲဒိ စစ်အုပ်စုမထိန်းချုပ်နိုင်တဲ့ နယ်မြေတွေမှာ ပြည်သူတွေဟာဒီမိုကရေစီစံနှုန်းတွေနဲ့ အပြန်အလှန်ကူညီရင်းပြည်သူ့အုပ်ချုပ်ရေးစနစ်လည်ပတ်နိုင်ဖို့ ကြိုးစားနေကြပြီဖြစ်တယ်လို့ဆိုပါတယ်။
အဲဒီအပြင် နိုင်ငံတကာအစိုးရတွေအနေနဲ့ စစ်အုပ်စုရဲ့အတုအယောင်ရွေးကောက်ပွဲကို ငြင်းပယ်ဖို့နဲ့စစ်အုပ်စုရဲ့ အကြမ်းဖက်မှုတွေကို သက်ဆိုးရှည်စေမယ့် ဘဏ္ဍာငွေ၊ စစ်လက်နက်နဲ့ လေယာဉ်ဆီလမ်းကြောင်းတွေကို ဖြတ်တောက်ဖို့အတွက် ဟန်ချက်ညီညီ ဒဏ်ခတ်ပိတ်ဆို့မှုတွေလုပ်ဆောင်ပေးဖို့လည်း တောင်းဆိုထားပါတယ်။
တော်လှန်ရေး ခြောက်နှစ်တာကာလထဲကို ဝင်ရောက်လာတော့မှာဖြစ်လို့ ကမ္ဘာကြီးအနေနဲ့စစ်ရာဇဝတ်ဂိုဏ်းကို အမြစဖြတ်ချေမှုန်းပြီး ဖက်ဒရယ်ဒီမိုကရေစီ တည်ဆောက်နေတဲ့ မြန်မာပြည်သူတွေနဲ့အတူ သွေးစည်းညီညွတ်စွာ ရပ်တည်ပေးဖို့လိုအပ်တယ်လို့တိုက်တွန်းထားပါတယ်။
