Border News Agency
မြောက်ဦး၊ ဖေဖော်ဝါရီ ၁။
အာဏာသိမ်းငါးနှစ်တာအတွင်းမှာ မြန်မာပြည်သူသန်းပေါင်းများစွာဟာ မရပ်မနားဖြစ်ပွားနေတဲ့ပဋိပက္ခတွေကြောင့် ဆင်းရဲဒုက္ခတွေနဲ့ရင်ဆိုင်နေရဆဲဖြစ်တယ်လို့ မြန်မာနိုင်ငံ ဥရောပသမဂ္ဂ (EU) က အထူးထုတ်ပြန်လိုက်ပါတယ်။
အဲဒီထဲ အထူးသဖြင့်မြန်မာပြည်သူ ဆယ်သန်းကျော်ဟာ အရေးပေါ်အကူအညီတွေကို ချက်ချင်းလိုအပ်နေပြီး နေရပ်စွန့်ခွာထွက်ပြေးရသူဦးရေဟာ သုံးဒသမခြောက်သန်းကျော်အထိ ရှိလာခဲ့ပြီလို့ EU က ထောက်ပြပါတယ်။
အဲဒါကြောင့် အကူအညီတွေကို အတားအဆီးမရှိဝင်ရောက်ခွင့်ပေးဖို့နဲ့ အကြမ်းဖက်မှုတွေကို ချက်ချင်းရပ်ဖို့ လိုအပ်နေပြီလို့ဆိုပါတယ်။
စစ်ကော်မရှင်တပ်လုပ်ဆောင်ခဲ့တဲ့ ၂၀၂၅ ခုနှစ်၊ ဒီဇင်ဘာလနဲ့ ၂၀၂၆ ခုနှစ် ဇန်နဝါရီလ ရွေးကောက်ပွဲလုပ်ငန်းစဉ်တွေဟာလည်း လွတ်လပ်ပြီးတရားမျှတတဲ့ အခြေခံအချက်တွေ လုံးဝမပြည့်မီခဲ့ဘူးလို့ EU က ဆိုပါတယ်။
အဲဒါကြောင့် ဒီရွေးကောက်ပွဲဟာယုံကြည်စိတ်ချရမှုမရှိသလို အားလုံးပါဝင်ပတ်သက်မှုလည်း မရှိတဲ့အတွက် တရားမဝင်ဘူးလို့ဆိုပါတယ်။
အဲဒီအပြင် အခြေခံလွတ်လပ်ခွင့်တွေကိုပိတ်ပင်ထားပြီး ကြောက်ရွံ့မှုတွေ ပြန့်နှံ့နေတဲ့ကြားကကျူးလွန်နေတဲ့ လူ့အခွင့်အရေးချိုးဖောက်မှုတွေကိုလည်း EU က ပြင်းပြင်းထန်ထန် ရှုတ်ချပါတယ်။
အကြောင်းမဲ့ဖမ်းဆီးခံထားရသူအားလုံးကို အမြန်ဆုံးလွှတ်ပေးဖို့နဲ့ နိုင်ငံရေးလုပ်ငန်းစဉ်တရပ်အပေါ် ကတိကဝတ်ပြုဖို့ကိုလည်း တိုက်တွန်းထားပါတယ်။
ဥရောပသမဂ္ဂဟာ မြန်မာနိုင်ငံအတွက် အရေးပေါ်အခြေအနေကိုတုံ့ပြန်ရာမှာ အကြီးဆုံးအလှူရှင်အဖြစ် ဆက်လက်ရပ်တည်မှာဖြစ်ပြီး ဒုက္ခရောက်နေသူတွေဆီ အကူအညီတွေထိရောက်စွာပေးပို့နိုင်ဖို့ နည်းလမ်းတွေကို ဆက်ပြီးရှာဖွေသွားမှာဖြစ်တယ်လို့ ဆိုပါတယ်။
အာဆီယံရဲ့ ဘုံသဘောတူညီချက်ငါးချက်ကိုလည်း ဆက်ပြီးထောက်ခံနေတယ်လို့ ဆိုပါတယ်။
ဥရောပသမဂ္ဂဟာ ဒီမိုကရေစီနဲ့ငြိမ်းချမ်းရေးကိုလိုလားတဲ့ မြန်မာပြည်သူတွေနဲ့အတူ တသားတည်း ရပ်တည်နေမှာဖြစ်တယ်လို့ ဆိုပါတယ်။
အာဏာသိမ်းငါးနစ်ပြည့်တဲ့အချိန်မှာ လူ့အခွင့်အရေးတွေကိုလေးစားပြီး တရားမျှတတဲ့လမ်းကြောင်းပေါ် ပြန်ရောက်ဖို့လိုအပ်နေပြီလို့လည်း ဆိုပါတယ်။
