Border News Agency
ရန်ကုန်၊ ဧပြီ ၁၇။
စစ်ကော်မရှင်က မတရားဖမ်းဆီးပြီး ထောင်ဒဏ်တသက် အမိန့်ချမှတ်ထားတဲ့ နိုင်ငံတကာဆုရ မှတ်တမ်းရုပ်ရှင်ဒါရိုက်တာ မရှင်ဒေဝီဟာ ဧပြီလ ၁၇ ရက်၊ မြန်မာနှစ်ဆန်းတရက်နေ့မှာ လွတ်ငြိမ်းခွင့်နဲ့ အကျဉ်းထောင်ကနေ ပြန်လည်လွတ်မြောက်လာပါတယ်။
မရှင်ဒေဝီဟာ အင်းစိန်အကျဉ်းထောင်ကနေ ဒီနေ့မနက်ပိုင်းမှာ ပြန်လည်ထွက်ခွာလာနိုင်ပြီဖြစ်တယ်လို့ နီးစပ်သူတွေနဲ့ မိသားစုဝင်တွေက အတည်ပြုထားပါတယ်။
သူဟာ ၂၀၂၃ ခုနှစ်အတွင်းက ဒရုန်းလက်ဝယ်တွေ့ရှိတယ်ဆိုတဲ့ စွပ်စွဲချက်နဲ့ ဖမ်းဆီးခံခဲ့ရတာ ဖြစ်ပါတယ်။
အဖမ်းခံရပြီးနောက် ၂၀၂၄ ခုနှစ်၊ ဇန်နဝါရီလမှာ အကြမ်းဖက်မှုတိုက်ဖျက်ရေးဥပဒေ ပုဒ်မတွေနဲ့ ထောင်ဒဏ်တသက်အထိ ပြင်းထန်တဲ့ ပြစ်ဒဏ် ချမှတ်ခံခဲ့ရတာပါ။
မရှင်ဒေဝီဟာ ၂၀၀၇ ရွှေဝါရောင်တော်လှန်ရေးနဲ့ လူမှုရေး၊ နိုင်ငံရေး မှတ်တမ်းရုပ်ရှင်ကောင်းတွေကြောင့် ကမ္ဘာ့အဆင့်အထိ ထင်ရှားတဲ့ ပညာရှင်တဦးလည်း ဖြစ်ပါတယ်။
ဒီနေ့မှာကျရောက်တဲ့ နှစ်ဆန်းတရက်နေ့မှာ တနိုင်ငံလုံးက အကျဉ်းထောင်တွေကနေ အကျဉ်းသား ၄,၀၀၀ ကျော်ကို လွှတ်ပေးမယ်လို့ စစ်ကော်မရှင်ဘက်က ကြေညာထားပါတယ်။
ဒါပေမယ့် အဲဒီလွှတ်ပေးတဲ့အထဲမှာ နိုင်ငံရေးအကျဉ်းသား ဘယ်လောက်အထိ ပါဝင်လာမလဲဆိုတာကိုတော့ ဆက်လက်စောင့်ကြည့်နေကြရပါတယ်။
