Border News Agency
ရန်ကုန်၊ဧပြီ ၁၈။
မတရားဖမ်းဆီးခံထားရတဲ့ နိုင်ငံတော်သမ္မတ ဦးဝင်းမြင့်နဲ့ နိုင်ငံရေးအကျဉ်းသားအချို့ မိသားစုနဲ့ ပြန်လည်ဆုံစည်းခွင့်ရတာဟာ ပြည်သူတွေရဲ့တော်လှန်ရေးအောင်ပွဲ အစိတ်အပိုင်းတခုဖြစ်တယ်လို့ အမျိုးသားညီညွတ်ရေးအစိုးရ (NUG) က ဒီနေ့မှာ သဘောထားထုတ်ပြန်လိုက်ပါတယ်။
အမျိူးသားညီညွတ်ရေးအစိုးရအနေနဲ့ ၂၀၂၀ ရွေးကောက်ပွဲရလဒ်ကို ဆက်လက်ကိုင်စွဲထားသလို သမ္မတဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကိုလည်း ပြည်သူ့ရွေးကောက်ခံ ခေါင်းဆောင်တွေအဖြစ် ဆက်လက်အသိအမှတ်ပြုထားတယ်လို့ဆိုပါတယ်။
နွေဦးတော်လှန်ရေးရဲ့ အန္တိမပန်းတိုင်ဟာ ဒေါ်အောင်ဆန်းစုကြည်အပါအဝင် ဖမ်းဆီးခံထားရသူအားလုံး လွတ်မြောက်ရေးသာမက၊စစ်အာဏာရှင်စနစ်နဲ့ အဆိုးကျော့သံသရာကနေ အပြီးတိုင်လွတ်မြောက်ရေးဖြစ်တယ်လို့ ဆိုပါတယ်။
ဒါ့အပြင် တော်လှန်ရေးရဲ့ ရည်မှန်းချက်တွေဖြစ်တဲ့ စစ်တပ်က နိုင်ငံရေးမှာ ပါဝင်နေမှုကို အဆုံးသတ်ဖို့၊လက်နက်ကိုင်တပ်အားလုံး အရပ်သားအစိုးရအောက်မှာရှိဖို့၊ ၂၀၀၈ ဖွဲ့စည်းပုံကို ဖျက်သိမ်းပြီး ဖက်ဒရယ်ဒီမိုကရေစီဖွဲ့စည်းပုံသစ် ရေးဆွဲဖို့ဆိုတဲ့ ဘုံသဘောထား ၆ ရပ်ကိုလည်း ဆက်လက်စွဲကိုင်သွားမယ်လို့ဆိုပါတယ်။
စစ်ကော်မရှင်တပ်က ကျူးလွန်ခဲ့တဲ့ စစ်ရာဇဝတ်မှုတွေအတွက် တရားမျှတမှုဖော်ဆောင်နိုင်မှသာ တော်လှန်ရေးအောင်မြင်တယ်လို့ မှတ်ယူမှာဖြစ်ပြီး ရည်မှန်းချက်ပန်းတိုင်ရောက်တဲ့အထိ အဆုံးတိုင် ဆက်လက်တိုက်ပွဲဝင်သွားမယ်လို့ လည်းဆိုပါတယ်။
