Border News Agency
နေပြည်တော်၊ ဧပြီ ၂၆။
စစ်ကော်မရှင်တပ်ရဲ့ နိုင်ငံရေးဦးဆောင်မှုမှာ ရှိနေသရွေ့မြန်မာပြည်ငြိမ်းချမ်းရေးရမှာမဟုတ်ဘူးလို့ အမျိုးသားညီညွတ်ရေးအတိုင်ပင်ခံကောင်စီ (NUCC)က ဧပြီလ၂၅ ရက်၊ မနေ့ကထုတ်ပြန်ပါတယ်။
စစ်ကော်မရှင်တပ်ဟာ ဧပြီလကုန်ကနေ ဇူလိုင်လကုန်အထိ ငြိမ်းချမ်းရေးဆွေးနွေးဖို့ ဖိတ်ခေါ်ထားမှုဟာ တော်လှန်ရေးအင်အားစုတွေကို သွေးခွဲဖို့နဲ့ နိုင်ငံရေးအရ တရားဝင်မှုရဖို့ ကြိုးပမ်းတဲ့ အတုအယောင်ဖိတ်ခေါ်မှုသာ ဖြစ်တယ်လို့ ဆိုပါတယ်။
သူတို့တွေဟာ နိုင်ငံရေးမှာ ဆက်ရှိနေသရွေ့ တွေ့ဆုံဆွေးနွေးရေး နည်းလမ်းနဲ့ ပြည်သူတွေလိုလားတဲ့ ရလဒ်တွေ ရရှိမှာမ
ဟုတ်ဘဲ စစ်အာဏာရှင်စနစ် သက်ဆိုးရှည်နေဦးမှာလို့ဆိုပါတယ်။
ဒါကြောင့် တော်လှန်ရေးအင်အားစုတွေအနေနဲ့ စစ်ကော်မရှင်တပ်ကနိုင်ငံရေးမှာ ပါဝင်နေမှုကို အဆုံးသတ်ဖို့၊၂၀၀၈ ဖွဲ့စည်းပုံကို ဖျက်သိမ်းဖို့နဲ့ ဖက်ဒရယ်ဒီမိုကရေစီ တည်ဆောက်ဖို့ဆိုတဲ့ နိုင်ငံရေးဦးတည်ချက် ၆ ရပ်အတိုင်း ဆက်လက်ရပ်တည်သွားမယ်လို့ ဆိုပါတယ်။
မြန်မာနိုင်ငံရဲ့ ပြဿနာတွေကို ဖြေရှင်းနိုင်ဖို့အတွက် နိုင်ငံရေးမှာစစ်ကော်မရှင်တပ်ပါဝင်မှု မရှိတော့မှသာလမ်းစပွင့်လာမှာဖြစ်လို့ တော်လှန်ရေးအင်အားစုတွေအနေနဲ့ ဘုံရည်မှန်းချက်အတိုင်း ဆက်လက်တိုက်ပွဲဝင်ကြဖို့လည်း တိုက်တွန်းထားပါတယ်။
