Border News Agency
ထိုင်း၊ ဧပြီ ၂၆။
ထိုင်း-မြန်မာနယ်စပ်တာ့ခ်ခရိုင်အတွင်းကနေ မြန်မာနိုင်ငံဘက်ကို စက်သုံးဆီတွေ တရားမဝင် ခိုးထုတ်နေတဲ့ မှောင်ခိုအဖွဲ့ကို ထိုင်းအမှတ် ၃၅ခြေလျင်တပ်ရင်းနဲ့ ပူးပေါင်းအဖွဲ့တွေကဧပြီလ ၂၆ ရက်၊မနက်ပိုင်းမှာ ဖမ်းဆီးရမိခဲ့တယ်လို့ ထိုင်းတော်ဝင်တပ်ဖွဲ့က ဧပြီလ ၂၆ ရက်၊ဒီနေ့ထုတ်ပြန်ပါတယ်။
အဲဒီထိုင်းအစိုးရရဲ့ နယ်စပ်စက်သုံးဆီ တားမြစ်မိန့်အရ ထိုင်းစစ်တပ်နဲ့ ရဲတပ်ဖွဲ့ဝင်တွေဟာ ထားဆောင်ယန်းနဲ့ မဲရမတ်ခရိုင်တလျှောက် ကင်းလှည့်စောင့်ကြည့်နေချိန်မှာ အခုလို ဖမ်းမိခဲ့တာပါ။
အဲဒီဖမ်းဆီးမှုအတွင်း ပြစ်မှုကျူးလွန်သူ ငါးဦးကိုဖမ်းဆီးရမိခဲ့သလို သောင်းရင်းမြစ် သဘာဝလမ်းကြောင်းကနေ မြန်မာဘက်ကို ပို့ဆောင်မယ့် စက်သုံးဆီ လီတာပေါင်းများစွာကိုလည်း သိမ်းဆည်းနိုင်ခဲ့တယ်လို့ဆိုပါတယ်။
အဲဒီသိမ်းဆည်းရမိတဲ့ ဆီတွေထဲမှာ ဓာတ်ဆီနဲ့ ဒီဇယ်ဆီ စုစုပေါင်း နှစ်ထောင့်ရှစ်ရာ့လေးဆယ်လီတာပါဝင်ပြီး ကာလတန်ဖိုးအားဖြင့် ထိုင်းဘတ်ငွေ တသိန်းကျော်ကျော် ရှိတယ်လို့ သိရပါတယ်။
အဲဒီ ဖမ်းဆီးရမိသူတွေကို သက်ဆိုင်ရာရဲစခန်းတွေမှာ အမှုဖွင့်ထားပြီး သိမ်းဆည်းရမိတဲ့ ဆီတွေကိုလည်း ဥပဒေအရ ဆက်လက်စစ်ဆေး အရေးယူသွားမယ်လို့ ဆိုပါတယ်။
