Border News Agency
နေပြည်တော်၊ ဧပြီ ၂၆။
စစ်ကော်မရှင်တပ်အတွက် လေယာဉ်နဲ့ လက်နက်ပွဲစားလုပ်ပေးနေတဲ့ ကျော်မင်းဦးရဲ့ ကွန်ရက်တွေကိုဒဏ်ခတ်ပိတ်ဆို့မှုတွေ တိုးမြှင့်လုပ်ဆောင်ဖို့ Justice For Myanmar (JFM) ကဧပြီလ ၂၆ ရက်၊ ဒီနေ့မှာတိုက်တွန်းတောင်းဆိုလိုက်ပါတယ်။
လက်နက်ပွဲစား ကျော်မင်းဦးနဲ့ ဆက်နွယ်နေတဲ့ ကုမ္ပဏီတွေဟာ ထိုင်းစတော့အိတ်ချိန်းစာရင်းဝင် ACC ကုမ္ပဏီရဲ့ ရှယ်ယာတွေကို နောက်ဖေးပေါက်ကနေ ဝယ်ယူဖို့ ကြိုးပမ်းနေတာကို ဟန့်တားဖို့ JFM က ဆိုပါတယ်။
အဲဒီရှယ်ယာ လွှဲပြောင်းရောင်းချရေးကိစ္စကို ACC အစုရှယ်ယာရှင်တွေကဧပြီလ ၂၇ ရက်မှာ မဲခွဲဆုံးဖြတ်ဖို့ ရှိနေတာပါ။
ကျော်မင်းဦးဟာ သူ့ရဲ့ Sky Aviator ကုမ္ပဏီကွန်ရက်ကတဆင့် ရုရှားနိုင်ငံထုတ် စစ်လေယာဉ်တွေကို လေတပ်အတွက် ဝယ်ယူပေးနေတဲ့ အဓိကပွဲစားဖြစ်ပြီး အဲဒီကွန်ရက်မှာ မြန်မာ၊စင်ကာပူနဲ့ ထိုင်းနိုင်ငံက လုပ်ငန်းတွေ ပါဝင်နေပါတယ်။
ဒါကြောင့် အမေရိကန်၊ ယူကေ၊ အီးယူ၊ ကနေဒါနဲ့ ဩစတြေးလျနိုင်ငံတွေအနေနဲ့ Sky Aviator ကွန်ရက်တခုလုံးကို ပစ်မှတ်ထား ဒဏ်ခတ်ပိတ်ဆို့ဖို့ JFM က တောင်းဆိုထားတာပါ။
ထိုင်းအာဏာပိုင်တွေအနေနဲ့လည်း ထိုင်းအများပိုင်ကုမ္ပဏီတစ်ခုကို လက်နက်ပွဲစားတွေရဲ့ ငွေကြေးခဝါချရာလမ်းကြောင်းအဖြစ် အသုံးချမခံရအောင် ကာကွယ်ဟန့်တားဖို့တိုက်တွန်းထားပါတယ်။
