Border News Agency
အီရန်၊ ဧပြီ ၂၉။
ဟော်မုဇ်ရေလက်ကြားကို ပြန်ဖွင့်ပေးဖို့ အီရန်ရဲ့ နောက်ဆုံးကမ်းလှမ်းချက်ကို အမေရိကန်ဘက်က လက်ခံဖို့ အလားအလာ နည်းနေပါတယ်။
အီရန်က ရေလက်ကြားပြန်ဖွင့်ပေးမယ့်အစား သူတို့အပေါ် ပိတ်ဆို့ထားတဲ့ ရေတပ်အင်အားသုံး ပိတ်ဆို့မှုတွေကို ဖယ်ရှားပေးဖို့နဲ့ နျူကလီးယားကိစ္စဆွေးနွေးပွဲတွေကို စစ်ပြီးမှလုပ်ဖို့ ကမ်းလှမ်းထားတာပါ။
သမ္မတထရမ့်ဟာ ဧပြီလ ၂၆ရက်နေ့က အမျိုးသားလုံခြုံရေးအကြံပေးတွေနဲ့ တွေ့ဆုံခဲ့ပေမယ့် အီရန်ရဲ့ အဆိုပြုချက်အပေါ် စိတ်တိုင်းမကျဖြစ်နေတယ်လို့ သိရပါတယ်။
အမေရိကန်ဘက်က အဓိကထားတဲ့ နျူကလီးယားကိစ္စကို အခုဆွေးနွေးပွဲမှာ မပါဝင်ဘဲ နောက်ဆုတ်ထားတာကို ထရမ့်က သဘောမကျတာ ဖြစ်ပါတယ်။
အမေရိကန် နိုင်ငံခြားရေးဝန်ကြီး မာကိုရူဘီယိုကတော့ အီရန်ရဲ့ ကမ်းလှမ်းချက်ဟာ ထင်ထားတာထက် ပိုကောင်းပေမယ့် အီရန်ရဲ့ရည်ရွယ်ချက်ကိုတော့ သံသယရှိနေဆဲလို့ ဆိုပါတယ်။
အီရန်အနေနဲ့ နျူကလီးယားလက်နက် ထုတ်လုပ်ဖို့ ကြိုးပမ်းမှာကို တားဆီးနိုင်မယ့် သဘောတူညီချက်မျိုးကိုပဲ အမေရိကန်က အလိုရှိနေတာပါ။
ဂျာမနီဝန်ကြီးချုပ် ဖရိုင်းဒရစ် မာ့ဇ် အပါအဝင် ဥရောပမဟာမိတ်တွေကတော့ ဒီစစ်ပွဲကြောင့် စွမ်းအင်ဈေးနှုန်းတွေ တက်နေတာကို စိတ်ပျက်နေကြပြီး ထရမ့်အပေါ် ဖိအားပေးမှုတွေ ရှိနေပါတယ်။
အီရန်ဟာ သံတမန်ရေးအရ ကျွမ်းကျင်စွာ ကစားနေတယ်လို့လည်း ဥရောပဘက်က သုံးသပ်နေကြပါတယ်။
လက်ရှိမှာတော့ ပါကစ္စတန်နိုင်ငံကတဆင့် ပေးပို့တဲ့ အီရန်ရဲ့ဒီကမ်းလှမ်းချက်ဟာ အမေရိကန်နဲ့ အစ္စရေးတို့ရဲ့ အကျပ်အတည်းကို ဖြေရှင်းနိုင်မလားဆိုတာ စောင့်ကြည့်ရမှာပါ။
အီရန်ကတော့ သူတို့အပေါ် ရန်စမှုတွေ အပြီးတိုင်ရပ်တန့်မှသာ ဒေသတွင်းတည်ငြိမ်မှုရမယ်လို့ ကုလသမဂ္ဂမှာ ပြောကြားထားပါတယ်။
