Border News Agency
မူဆယ်၊ ဧပြီ ၃၀။
ရှမ်းပြည်မြောက်ပိုင်း၊ မူဆယ်မြို့မှာ အွန်လိုင်းလိမ်လည်လောင်းကစားမှု လုပ်ကိုင်နေသူတွေနဲ့ တရားမဝင် ဝင်ရောက်နေထိုင်သူ ၄၀ ဦးကို ဖမ်းဆီးရမိတယ်လို့ စစ်ကော်မရှင်တပ်က ဧပြီလ ၃၀ ရက်၊ ဒီနေ့ထုတ်ပြန်ပါတယ်။
အဲဒီပူးပေါင်းအဖွဲ့တွေက မူဆယ်မြို့၊ တော်ရွက်ရပ်ကွက်ထဲက နေအိမ်တလုံးကို ဝင်ရောက်စစ်ဆေးရာမှာ အွန်လိုင်းလိမ်လည်မှုလုပ်နေတဲ့ တရုတ်နိုင်ငံသား ၂ ဦးနဲ့ မြန်မာနိုင်ငံသား ၁၂ ဦးကို ဆက်စပ်ပစ္စည်းတွေနဲ့အတူ ဖမ်းမိခဲ့တာ ဖြစ်ပါတယ်။
ဒါ့အပြင် ဟိုမွန်ရပ်ကွက်က တခြားနေအိမ်တလုံးမှာလည်း နိုင်ငံအတွင်းတရားမဝင် ဝင်ရောက်နေထိုင်နေတဲ့ တရုတ်နိုင်ငံသား ၂၆ ဦးကို ထပ်မံတွေ့ရှိ ဖမ်းဆီးခဲ့တယ်လို့ ဆိုပါတယ်။
ဖမ်းဆီးရမိသူတွေဆီကနေ အွန်လိုင်းလိမ်လည်ရာမှာ အသုံးပြုတဲ့ ဖုန်း ၂၄ လုံး၊ ကွန်ပျူတာ ၁၉ လုံးနဲ့ ဝိုင်ဖိုင်စက်တွေကိုလည်း သက်သေခံပစ္စည်းအဖြစ် သိမ်းဆည်းရမိခဲ့တယ်လို့ ဆိုပါတယ်။
အဲဒီဖမ်းဆီးရမိသူတွေကို ဥပဒေအရ အရေးယူဖို့ လုပ်ဆောင်နေသလို တရားမဝင် ဝင်ရောက်လာတဲ့ တရုတ်နိုင်ငံသားတွေကိုလည်း သက်ဆိုင်ရာနိုင်ငံထံ ပြန်လည်လွှဲပြောင်းဖို့ စီစဉ်နေတယ်လို့ဆိုပါတယ်။
