Border News Agency
နေပြည်တော်၊ မေ ၁။
နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို အာဏာသိမ်းစစ်တပ်နေရာပြောင်းလိုက်တယ်လို့ တရားဝင်ထုတ်ပြန်ပေမယ့် မိခင်ဖြစ်သူနဲ့ တိုက်ရိုက်တွေ့ဆုံခွင့်၊ အဆက်အသွယ်လုပ်ခွင့်ပေးဖို့သားဖြစ်သူ ကိုထိန်လင်းတောင်းဆိုလိုက်ပါတယ်။
“အမေ့ကို နေအိမ်အကျယ်ချုပ်တကယ်ပြောင်းလိုက်တယ်ဆိုရင် ကျွန်တော်နဲ့ အဆက်အသွယ်လုပ်ဖို့ ခွင့်ပြုပေးသင့်ပါတယ်။ ဒါဟာ အခြေခံလူ့အခွင့်အရေးပါပဲ”။လို့ ကိုထိန်လင်းက RFA သတင်းဌာနနဲ့ အင်တာဗျူးမှာ ပြောတာပါ။
သူမနေရာကိုအတိအကျမထုတ်ပြန်ဘဲ နေရာပြောင်းနေတာတွေကို အပြည်ပြည်ဆိုင်ရာကြက်ခြေနီအဖွဲ့ (ICRC)လိုလွတ်လပ်တဲ့အဖွဲ့အစည်းတွေ၊ နိုင်ငံတကာသံတမန်တွေနဲ့ တွေ့ခွင့်ပေးပြီး အသက်ရှင်နေကြောင်း သက်သေပြဖို့ လိုအပ်တယ်လို့လည်း ဆိုပါတယ်။
သူမကို နေအိမ်ပြောင်းတာ၊ ထောင်ဒဏ်လျှော့ပေါ့မှုတွေလုပ်နေပေမယ့် မိခင်ဖြစ်သူနဲ့ တွေ့ခွင့်ရဖို့ တောင်းဆိုချက်တွေကိုတော့ တကြိမ်တခါမျှ တုံ့ပြန်တာမရှိခဲ့ဘူးလို့ ဆိုပါတယ်။
“မြန်မာပြည်ကို သွားလို့ရမယ်ဆိုရင် အခုချက်ချင်း သွားချင်ပါတယ်။ ဒါပေမယ့် ဖြစ်လာမယ်လို့ မထင်ဘူးလို့”ကို ထိန်လင်းကပြောပါတယ်။
အဲဒီအပြင်ပြည်တွင်းပြည်ပရှိ မြန်မာပြည်သူတွေကိုလည်း ဒီမိုကရေစီရဖို့ လုံးဝလက်မလျှော့ပါနဲ့၊ အရှုံးပေးမှာမဟုတ်ဘူး လို့ ကိုထိန်လင်းက အားပေးစကားပါးလိုက်ပါတယ်။
အာဏာသိမ်းစစ်တပ်ဟာ ဧပြီလ ၃၀ ရက်နေ့ က ဒေါ်အောင်ဆန်းစုကြည်ကို နေအိမ်အကျယ်ချုပ်ရွှေ့ပြောင်းပြီး ထောင်ဒဏ် ၆ ပုံ ၁ ပုံ လျှော့ပေးကြောင်း ကြေညာပေမယ့် သူမကို ဘယ်မှာထားတယ်၊ ကျန်းမာရေးဘယ်လိုရှိတယ်ဆိုတာကို မိသားစုဝင်တွေဆီ အကြောင်းကြားတာမျိုး မရှိသေးပါဘူး။
