Border News Agency
ရုရှား၊ မေ ၄။
ရုရှားနိုင်ငံရဲ့ အဓိက ရေနံတင်ပို့ရာ အချက်အချာဖြစ်တဲ့ ဘောလ်တစ်ပင်လယ်က ပရီမော့စ်ဆိပ်ကမ်းကို ယူကရိန်းတပ်ဖွဲ့တွေက ဒရုန်းတွေနဲ့ တိုက်ခိုက်ခဲ့တာကြောင့် ရေနံတင်သင်္ဘောနဲ့ စစ်သင်္ဘောတချို့ ထိခိုက်ပျက်စီးသွားတယ်လို့ သိရပါတယ်။
ယူကရိန်းသမ္မတ ဇလန်းစကီးကတော့ ဒီတိုက်ခိုက်မှုဟာ အောင်မြင်ခဲ့ပြီး ‘ကာရာကတ်’ စစ်သင်္ဘောတစီးအပြင် ကင်းလှည့်သင်္ဘောနဲ့ ရေနံတင်သင်္ဘောတစီးကို ထိမှန်ဖျက်ဆီးနိုင်ခဲ့သလို ဆိပ်ကမ်းအဆောက်အအုံတွေလည်း ပျက်စီးခဲ့တယ်လို့ ဆိုပါတယ်။
ရုရှားအာဏာပိုင်တွေဘက်ကတော့ အဲဒီဒေသမှာ ဒရုန်းအစင်း ၆၀ ကျော်ကို ပစ်ချနိုင်ခဲ့ပြီး မီးလောင်မှုဖြစ်ပွားခဲ့ပေမယ့် ငြှိမ်းသတ်နိုင်ခဲ့သလို ရေနံယိုစိမ့်မှုတော့ မရှိဘူးလို့ ထုတ်ပြန်ထားပါတယ်။
ယူကရိန်းစစ်ပွဲဟာ အခုဆိုရင် ၄ နှစ်ထဲကို ရောက်ရှိလာပြီဖြစ်ပြီး နှစ်ဖက်စလုံးက ဒရုန်းရာနဲ့ချီပြီး နေ့စဉ်နီးပါး အပြန်အလှန် တိုက်ခိုက်နေကြရာမှာ မနေ့တိုက်ခိုက်မှုတွေအတွင်း ရုရှားနဲ့ ယူကရိန်းနှစ်ဖက်လုံးမှာ အရပ်သားသေဆုံးမှုတွေလည်း ရှိခဲ့ပါတယ်။
ရုရှားအစိုးရပြောရေးဆိုခွင့်ရှိသူ ဒီမီထရီပက်စကော့ဗ်ကတော့ ယူကရိန်းက ရုရှားရဲ့ ရေနံအခြေခံအဆောက်အအုံတွေကို ဆက်တိုက်နေရင် ကမ္ဘာ့ရေနံစျေးနှုန်းတွေဟာ အခုရှိနေတဲ့ တစည်ကို ၁၂၀ ဒေါ်လာထက် ပိုတက်လာနိုင်တယ်လို့ သတိပေးထားပါတယ်။
