Border News Agency
ထိုင်း၊ မေ ၄။
ထိုင်း-မြန်မာနယ်စပ်၊ ချင်းမိုင်ခရိုင်၊ မယ်အေးမြို့နယ်အတွင်းမှာ မေလ ၃ ရက်၊မနက်အစောပိုင်းက ကာလတန်ဖိုးအမြောက်အမြားရှိတဲ့ အိုက်စ်မူးယစ်ဆေးဝါး ၃၀၀ ကီလိုဂရမ်ကို ထိုင်းစစ်တပ်က ဖမ်းဆီးရမိခဲ့ပါတယ်။
မြန်မာဘက်ကနေ မူးယစ်ဆေးဝါးတွေ မှောင်ခိုသယ်ဆောင်လာမယ့် သတင်းအရ ဖာမွန်းစစ်ကြောင်းက နယ်စပ်မှာ ကင်းပုန်းဝပ် စောင့်ဆိုင်းနေစဉ် အင်အား ၂၀ ခန့်ရှိတဲ့ အဖွဲ့နဲ့ ထိပ်တိုက်တွေ့ပြီး ပစ်ခတ်မှုဖြစ်ပွားခဲ့တာပါ။
အဲဒီမှောင်ခိုအဖွဲ့ဟာ မူးယစ်ဆေးဝါးထုတ်တွေကို စွန့်ပစ်ပြီးမှောင်ရိပ်ခိုထွက်ပြေးသွားခဲ့ကြလို့ ထိုင်းစစ်တပ်ဘက်က နယ်မြေရှင်းလင်းရေး ဆက်လုပ်ရာမှာ ကျောပိုးအိတ် ၂၀ လုံးကို သိမ်းဆည်းရမိခဲ့တာ ဖြစ်ပါတယ်။
အဲဒီကျောပိုးအိတ်တွေထဲမှာ တထုပ်ကို တကီလိုစီ ပါဝင်တဲ့ အိုက်စ် အထုပ်ပေါင်း ၃၀၀ ထည့်ထားတာကို စစ်ဆေးတွေ့ရှိခဲ့ရတယ်လို့ ထိုင်းစစ်တပ်က ထုတ်ပြန်ထားပါတယ်။
အဲဒီသိမ်းဆည်းရမိတဲ့ မူးယစ်ဆေးဝါးတွေကို သက်ဆိုင်ရာ ရဲစခန်းထံ အပ်နှံလိုက်ပြီး ထွက်ပြေးသွားတဲ့ မှောင်ခိုအဖွဲ့တွေကို ဖမ်းဆီးရမိဖို့ နယ်စပ်တစ်လျှောက် လုံခြုံရေးတိုးမြှင့်ရှာဖွေနေပါတယ်။
