Border News Agency
နေပြည်တော်၊ မေ ၅။
နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို အာဏာသိမ်းစစ်ခေါင်းဆောင်ကနေအိမ်အကျယ်ချုပ်ဆီ ပြောင်းရွှေ့လိုက်တာဟာ ဓားစာခံအဖြစ်အသုံးချတဲ့ သံတမန်ရေးရာလှည့်ကွက် သက်သက်သာဖြစ်တယ်လို့ Suu Foundation ကမေလ ၄ ရက်၊မနေ့ကထုတ်ပြန်ပါတယ်။
ဒေါ်အောင်ဆန်းစုကြည်ဟာ မတရားဖမ်းဆီးခံထားရစဉ်အတွင်း ပင်ပန်းဆင်းရဲမှုတွေ အလူးအလဲ ခံစားခဲ့ရတာကြောင့် လူသားဆန်တဲ့ စောင့်ရှောက်မှုတွေ ရရှိနိုင်မယ့်အခြေအနေကို ကြိုဆိုပေမယ့် လက်ရှိမှာ သူမအတွက် လုံလောက်တဲ့ ကျန်းမာရေးစောင့်ရှောက်မှုတွေ တကယ်လိုအပ်နေတယ်လို့ ဆိုပါတယ်။
ဒါ့အပြင် မိသားစုဝင်တွေ၊ရှေ့နေတွေနဲ့ပါ လွတ်လပ်စွာတွေ့ဆုံခွင့်ရဖို့က အလွန်အရေးကြီးတယ်လို့လည်း ထောက်ပြထားပါတယ်။
အာဏာသိမ်းစစ်တပ်ရဲ့အခုလုပ်ရပ်ဟာ ဓားစာခံကို အသုံးချပြီး သံတမန်ရေးအရ အမြတ်ထုတ်ဖို့ ကြိုးစားတာသာဖြစ်ပြီး ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံးကို ဘာစည်းကမ်းချက်မှမပါဘဲ အမြန်ဆုံး လွှတ်ပေးမှသာ ငြိမ်းချမ်းရေးအတွက် ရှေ့ဆက်နိုင်မှာဖြစ်တယ်လို့ဆိုပါတယ်။
ဒါ့အပြင်ပျက်ပြယ်နေပြီဖြစ်တဲ့ NCA လမ်းစဉ်တွေဟာ ငြိမ်းချမ်းရေးကို ဆောင်ကြဉ်းပေးနိုင်မှာ မဟုတ်ကြောင်းနဲ့ အကြမ်းဖက်မှုတွေကို အမှန်တကယ် ရပ်တန့်ဖို့လည်း တောင်းဆိုထားပါတယ်။
Suu Foundation အနေနဲ့ကတော့ ပြည်သူလူထုရဲ့ အကျိုးစီးပွားကို ရှေ့ရှုပြီး စစ်မှန်တဲ့ တရားမျှတမှုနဲ့ ငြိမ်းချမ်းရေး ရရှိဖို့အတွက် အစွမ်းကုန် ဆက်လက် ပံ့ပိုးသွားမယ်လို့ ကတိပြုထားပါတယ်။
