Border News Agency
နေပြည်တော်၊ မေ ၅။
မြန်မာနိုင်ငံဆိုင်ရာပါကစ္စတန်သံအမတ်ကြီး Mr. Tariq Karim ဟာ နေပြည်တော်မှာရှိတဲ့ တာဝန်ရှိသူတွေနဲ့ မေလ ၄ ရက်နေ့က သီးခြားစီတွေ့ဆုံခဲ့ပါတယ်။
အဲဒီတွေ့ဆုံမှုတွေအတွင်းမှာ နှစ်နိုင်ငံကြား ကုန်သွယ်ရေး၊ ရင်းနှီးမြှုပ်နှံမှုနဲ့ ဆေးဘက်ဆိုင်ရာကဏ္ဍတွေမှာ ပူးပေါင်းဆောင်ရွက်သွားဖို့ကိစ္စတွေကို အဓိကထားဆွေးနွေးခဲ့ကြတာပါ။
ဒုတိယသမ္မတဦးညိုစောနဲ့တွေ့ဆုံစဉ်မှာ နှစ်နိုင်ငံကြား ကုန်သွယ်ရေးနဲ့ရင်းနှီးမြှုပ်နှံမှုတွေပိုတိုးလာဖို့၊ လူ့စွမ်းအားအရင်းအမြစ်ဖွံ့ဖြိုးတိုးတက်ရေးနဲ့ ခရီးသွားလုပ်ငန်းတွေမှာ ပူးပေါင်းလုပ်ဆောင်ဖို့ကိစ္စရပ်တွေကို ပြောဆိုခဲ့ကြတယ်လို့သိရပါတယ်။
အဲဒီအပြင်ဒုတိယသမ္မတဒေါ်နန်းနီနီအေးနဲ့ တွေ့ဆုံရာမှာတော့ ပညာရေးနဲ့အမျိုးသမီးကဏ္ဍတွေအပြင် ဆေးဘက်ဆိုင်ရာသုတေသနလုပ်ငန်းတွေမှာ အတွေ့အကြုံဖလှယ်ဖို့နဲ့ ဆေးဘက်ဆိုင်ရာနှီးနှောဖလှယ်ပွဲတွေ ပူးပေါင်းကျင်းပနိုင်ဖို့အတွက် ဆွေးနွေးခဲ့တယ်လို့ဆိုပါတယ်။
နောက်ပြီးပြည်ထောင်စုဝန်ကြီးဦးခင်မောင်ရီနဲ့လည်း တွေ့ဆုံခဲ့ပြီး နှစ်နိုင်ငံကြား စီးပွားရေးနဲ့ကုန်သွယ်မှုတွေ ပိုပြီးတိုးတက်လာအောင် လုပ်ဆောင်နိုင်မယ့် အခြေအနေတွေကိုပါ ထည့်သွင်းဆွေးနွေးခဲ့ကြတယ်လို့ဆိုပါတယ်။
